पोखरा ।

नेपाल पत्रकार महासंघ कास्कीको आयोजना तथा पोखरा महानगरपालिकाको सहयोगमा आयोजित ३ दिने मल्टिमिडिया पत्रकारिता तालिम सुरु भएको छ । तालिम उद्घाटन गर्दै गण्डकी प्रदेशका सभामुख कृष्णप्रसाद धितालले समाजलाई सचेत, सुसुचित र सक्रिय गराउने काम पत्रकारिताको भएको बताए । पत्रकारलाई गतिशील बनाउन मदत गर्ने उनको भनाइ थियो ।

नेपाल पत्रकार महासंघ कास्कीका पूर्व अध्यक्ष कृष्णप्रसाद बास्तोलाले हाल सञ्चार क्षेत्रमा आर्थिक मन्दीको अवस्था रहेको बताउँदै पत्रकारिता क्षेत्रमा आकर्षण बढाउन र प्रविधिको प्रयोग गर्दै यस क्षेत्रलाई परिस्कृत तबरले आगाडि बढाउन तालिम प्रभावकारी हुने बताए । नेपाल खोजमूलक मल्टिमिडिया पत्रकारिता सञ्जालको प्राविधिक सहयोगमा सञ्चालित तालिमका प्रमुख प्रशिक्षक सञ्जालका संस्थापक रननीश भण्डारी छन् ।

नेपाल पत्रकार महासंघ कास्की अध्यक्ष माधव बरालको अध्यक्षतामा भएको कार्यक्रममा उपाध्यक्ष माधव रेग्मी र सचिव भुपाल गुरुङले पनि बोलेका थिए । ३ दिनसम्म सञ्चालन हुने तालिममा विभिन्न सञ्चार माध्यममा आवद्व ६० जना पत्रकार सहभागी छन् ।