लेखनाथ ।
विद्यार्थीको सिकाईलाई एकरुपता दिने उद्देश्यले कास्कीका गणित शिक्षकलाई तीन दिने शिक्षण सिकाई तालिम दिइएको छ । पोखरा महानगरपालिका वडा नंं २९ वडा कार्यालयको आर्थिक सहयोग र जनप्रकाश माविको व्यवस्थापनमा कास्कीका ४० विद्यालयका ८० गणित शिक्षकलाई तालिम दिइएको हो ।

मंगलबारदेखि सुरु भएको तालिम समापन समारोहमा पोखरा महानगरपालिका शिक्षा महाशाखाका प्रमुख हेमप्रसाद आचार्यले सिकाईको विधि फरक हुँदा विद्यार्थीमा देखिएको अस्पष्टता अन्त्य गर्नका लागि यस प्रकारको तालिम उपयोगी हुने विश्वास गरे । उनले हिजोको सिकाईलाई परिवर्तन गर्दै समयानुकूल सिकाईका विधि अवलम्बन गर्र्नुपर्नेमा जोड दिए ।

जनप्रकाश मावि विद्यालय व्यवस्थापन समिति अध्यक्ष बाबुराम सुवेदीको अध्यक्षतामा भएको कार्यक्रममा भवानी कालिका माविका प्रधानाध्यापक रमेश भट्टराई, कार्यक्रम संयोजन कृष्णप्रसाद पौडल, जनप्रकाश माविका प्रधानाध्यापक शेखरनाथ शर्मा लगायतले बोलेका थिए ।