पोखरा ।
पोखरामा २४ वर्षदेखि हुदै आएको बोलबम पदयात्रा यस वर्ष पनि हुने भएको छ । केदारेश्वर महादेवमणि सेवाश्रम समितिले यस वर्षको साउनमा बोलबम पदयात्रालाई थप व्यवस्थित बनाउने तयारी स्वरुप मन्दिर व्यवस्थापन समिति, आजीवन सदस्य, सल्लाहकार एवम विभिन्न संघ, संस्थाको भेला आयोजना गरेको हो ।

केदारेश्वर महादेवमणि बोलबम कार्यक्रमका संयोजक शंकर खरालले साउन महिनाको प्रत्येक सोमबार बगरको गाईघाटस्थित १०८ धारामा स्नान गरी आठ किलोमिटर पैदलयात्रा सहित केदारेश्वर महादेवमणि बोलबम धाममा जलार्पण गरिने बताए । केदारेश्वर महादेवमणि सेवाश्रमका पिठाधीश चिद्घन चैतन्यले हरेक सोमबार केदारेश्वर मन्दिरमा भक्तजनको भिड लागे पनि बोलबम पैदल जलयात्रामा कम भक्तजन सहभागी हुने गरेको जनाए ।

यो वर्ष बोलबमलाई सफल बनाउन बिभिन्न संघ, संस्थाले साथ दिने भएका छन् । मितेरी नारी समूह बैदाम, मारवाडी समूह कास्की, नेपाल भारत व्यवसायी (एनबी) समिति, अर्गानिक जुम्बासहितले सहयोग गर्ने भएका हुन् ।

भेलामा समाजसेवी वुद्धिनाथ अधिकारी, समितिका मिडिया सल्लाहकार दुर्गा अधिकारी, महिला सञ्जाल पोखरा ६ का अध्यक्ष बबिता मल्ल, अन्नपूर्ण केवलकारका कार्यकारी निर्देशक दिनेश पौडेल, नेपाल रेडक्रस सोसाइटी उपशाखा पोखरा ६ का सभापति तुलसी दाहाल, समाजसेवी गिरधारी अधिकारी, समितिका वरिष्ठ उपाध्यक्ष मीना भट्टराइ र सचिव ओमनाथ अधिकारीले बोलेका थिए ।