काठमाडौं ।  पूर्वराष्ट्रपति विद्यादेवी भण्डारीले राज्यबाट आफूले प्राप्त गर्दै आएको सम्पूर्ण सेवा-सुविधा फिर्ता गर्ने घोषणा गरेकी छन्। उनले आज, मंगलबारदेखि नै लागू हुने गरी ती सुविधाहरू नलिने निर्णय गरेकी हुन्।

भण्डारीको सचिवालयले सुविधा फिर्ता लिने सम्बन्धी औपचारिक निवेदन गृह मन्त्रालयमा पठाइसकेको छ। उनी निकट स्रोतले दिएको जानकारीअनुसार, पूर्वराष्ट्रपतिको हैसियतमा कानुनबमोजिम प्राप्त हुने सबै सुविधा फिर्ता लिने निर्णय भएको हो।

“पूर्वराष्ट्रपतिज्यूले पाउने सबै सेवा-सुविधा आजकै मितिबाट लागू हुनेगरी फिर्ता गर्न गृह मन्त्रालयलाई निवेदन पठाइएको छ,” स्रोतले भन्यो, “हामीले सोहीअनुसार सुविधा फिर्ताको प्रक्रिया अगाडि बढाएका छौं।”

यो निर्णयसँगै अब उनले राज्यकोषबाट कुनै पनि प्रकारको व्यक्तिगत सुविधा लिने छैनन्।