पोखरा ।
मदन भण्डारी फाउन्डेसन कास्कीले जननेता मदन भण्डारीको ७४ औं जन्म जयन्तीको अवसरमा असार २१ गते बृहत जनवादी सांस्कृतिक कार्यक्रम आयोजना गर्ने भएको छ ।

फाउन्डेसन कास्कीका अध्यक्ष माधव बास्तोलाले कार्यक्रम पोखरा सभागृहमा दिउँसो २ बजे सुरु हुने जनाए । कार्यक्रममा ख्यातिप्राप्त जनवादी कलाकार जीवन शर्मा, पूर्णकला बिसी लगायतका कलाकारको प्रस्तुतिसहित विविध सांस्कृतिक कार्यक्रमहरू हुने जनाए ।

जननेता मदन भण्डारीको स्मृतिमा स्थापित फाउन्डेसनले उनको योगदानलाई दीर्घकालसम्म स्मरणीय बनाउँदै युवा पुस्तालाई जानकारी दिन विचार गोष्ठी, स्मारिका प्रकाशन लगायतका कार्यक्रम गर्दै आएको छ । अध्यक्ष बास्तोलाले कार्यक्रममा प्रवेश शुल्क नलाग्ने जनाउँदै सहभागिताका लागि अनुरोध गरेका छन् ।