जोमसोम—
मुस्ताङमा आयुर्वेद स्वास्थ्य केन्द्रको सेवा विस्तार गरिएको छ । गण्डकी प्रदेश स्वास्थ्य मन्त्रालयको चालु आ.व.को विनियोजित बजेट ३४ लाख लागतबाट जिल्ला आयुर्वेद स्वास्थ्य केन्द्रको बिहिबार पूर्वाधार निर्माणसहित आयुर्वेद स्वास्थ्य सेवा विस्तार गरिएको छ ।

जिल्ला आयुर्वेद स्वास्थ्य सेवा केन्द्रले साविकमा प्रवाह गर्दैआईरहेको सेवालाई थप विस्तार गरेको हो । केन्द्रद्वारा यहाँ कार्यालयमा थेरापी सेवा,पञ्च कर्म÷पूर्व कर्म,सिरोधारा,साउना,विस्तारित ओपडी सेवा,शल्यकर्म,अग्निकर्म र मर्म चिकित्सा लगायतका सेवाहरु विस्तार गरेको केन्द्रका प्रमुख डा. सरोजकुमार रायले जानकारी दिनुभयो ।
आयुर्वेद स्वास्थ्य केन्द्रले यहाँ आयुर्वेद स्वास्थ्य सेवा सम्वन्धि साउनातर्फ १० लाख,भवन निर्माणतर्फ २० लाख,काठ तथा फर्निचरमा २ लाख र उपकरण खरिदमा २ लाख बजेट खर्च भएको कार्यालय प्रमुख डा. रायले उल्लेख गर्नुभयो ।

यहाँ मुस्ताङका प्रमुख जिल्ला अधिकारी विष्णुप्रसाद भुसालले आयुर्वेद स्वास्थ्य केन्द्रको विस्तारित सेवाको रिवन काटेर उद्घाटन गर्नुभयो । प्रजिअ भुसालले आयुर्वेद स्वास्थ्य केन्द्रको विस्तारित सेवाबाट मुस्ताङका नागरिक ,यहाँका सुरक्षा निकाय तथा कर्मचारी लगायत मुस्ताङ जिल्लामा भ्रमण गर्ने आन्तरिक तथा बाह्य पर्यटकहरु बढी भन्दा बढी लाभान्वित हुने बताउँनुभयो । यहाँ शारिरीक तथा मानसिक बिरामी र स्वस्थ्यकर मानिसका लागि पनि थप स्वस्थ रहन यहाँको आयुर्वेद उपचार पद्यती प्रभावकारी हुने विश्वाश व्यक्त गर्नुभयो ।

यहाँ जिल्ला आयुर्वेद स्वास्थ्य केन्द्रले विस्तारित सेवा प्रवाह अघि पनि यहाँका नागरिक,कर्मचारी,सुरक्षा निकाय र पर्यटकलाई विभिन्न प्रकारका आयुर्वेद सेवा प्रवाह गर्दैआईरहेको छ । केन्द्रले निःःशुल्क औषधि वितरण,प्रयोगशाला सेवा,योग परामर्श,चिकित्सकीय सेवा,जीवनशैली तथा आहार बिहार सम्वन्धि परामर्श लगायतका सेवा प्रदान गर्दैआईरहेको थियो ।
यहाँ आयुर्वेद स्वास्थ्य सेवा विस्तारका लागि कार्यालयका लागि सीमित जग्गा भएकाले सेवा विस्तारका लागि पूर्वाधार निर्माण गर्न समस्या परेको केन्द्रले जनाएको छ ।