काठमाडौँ ।
नेपाल टेलिकमले आफ्ना ग्राहकहरुका लागि विभिन्न आकर्षक प्याकेजसहितको ‘मनसुन अफर २०८२’ घोषणा गरेको छ । यो अफर असार २६ गतेदेखि लागु हुनेछ ।

ग्राहकहरूको सन्तुष्टि र डिजिटल आवश्यकतालाई ध्यानमा राख्दै टेलिकमले यो नयाँ अफर ल्याएको हो । यो अफर अन्तर्गत ग्राहकहरूले सस्तो दरमा भ्वाइस, डाटा तथा एसएमएस प्याकेजहरू प्राप्त गर्न सक्नेछन् । कम्पनीले ग्राहकहरूको प्रतिक्रिया, सुझाव र सेवा प्रयोगको शैलीलाई ध्यानमा राखेर यो अफर तयार पारेको जनाएको छ ।

अफरको सबैभन्दा विशेष पक्षमा, शारीरिक तथा मानसिक रूपमा फरक क्षमता भएका व्यक्तिहरूका लागि बोनससहितको प्याकेजको व्यवस्था गरिएको छ । साथै, लोकप्रिय ‘सजिलो अनलिमिटेड ६९९’ र ‘सजिलो अनलिमिटेड ७९९’ प्याकेजमा ३० प्रतिशतको विशेष छुट प्रदान गरिने टेलिकमले जनाएको छ ।

ग्राहकहरूले यी प्याकेजहरू खरिद गर्न आफ्नो मोबाइलबाट स्टार १४१५ ह्यास डायल गर्न सक्नेछन् । यसका साथै, ‘नेपाल टेलिकम’ एप प्रयोग गरेर पनि अफरबारे जानकारी लिन र प्याकेज खरिद गर्न सकिनेछ ।

कम्पनीका प्रवक्ता रवीन्द्र मानन्धरद्वारा जारी प्रेस विज्ञप्तिअनुसार, अफरसम्बन्धी थप विस्तृत जानकारी नेपाल टेलिकमको आधिकारिक वेबसाइटबाट प्राप्त गर्न सकिनेछ ।