म्याग्दी । म्याग्दीको मालिका गाउँपालिकामा पहिरोले पुरिएका बाबुछोरा दुवैको मृत्यु भएको छ। बुधबारदेखि बेपत्ता १३ वर्षीय सरोज विकको शव बिहीबार फेला परेपछि उक्त दुःखद घटना पुष्टि भएको हो।

बुधबार मालिका–३, लुप्सीपारको एक खोल्सामा दाउरा संकलन गर्न गएका ३६ वर्षीय जगेन्द्र विक र उनका छोरा सरोजलाई माथिबाट खसेको पहिरोले पुरेको थियो।

घटनालगत्तै बाबु जगेन्द्रको शव भेटिए पनि सरोज हराइरहेका थिए। उनको खोजीमा जुटेको संयुक्त टोलीले बिहीबार दिउँसो करिब सवा १ बजे शव फेला पारेको हो।

बेपत्ता बालकको खोजी कार्यमा सशस्त्र प्रहरी बलको म्याग्दीस्थित गुल्म, नेपाल प्रहरी र स्थानीय बासिन्दाहरू निरन्तर खटिएका थिए।