पोखरा । पोखरा महानगरपालिका वडा नं. १४ ले एक अनुकरणीय अभियानको थालनी गरेको छ। वडाले आफ्नो क्षेत्रभित्रका मुख्य सडकमा रहेका खाल्डाखुल्डी पुर्न ‘सडक खाल्टा पुरौं अभियान’ सुरु गरेको हो। यो अभियान साउन महिनाभरि चल्नेछ।

अभियानको पहिलो दिन वडाको भोटेचौतारा क्षेत्र वरपरका खाल्डाहरू पुरेर कामको शुभारम्भ गरिएको छ। वडा अध्यक्ष बोधबहादुर कार्कीका अनुसार, यो अभियान कुनै पनि सरकारी वा दातृ निकायको आर्थिक सहयोग बिना सञ्चालन गरिएको हो।

अध्यक्ष कार्कीले वडाभित्र कार्यरत निर्माण व्यवसायी र प्राविधिकहरूबाट सहयोग तथा श्रमदान जुटाएर अभियान अघि बढाइएको जानकारी दिए । उनले भने, “सरकारी बजेटबाट बनेका सडकहरू समयमै मर्मत नहुँदा जीर्ण बन्दै जाने र दुर्घटनाको जोखिम बढ्ने भएकाले हामीले कसैलाई नपर्खी यो अभियान थालेका हौं।”

यो अभियान वडा अध्यक्षसहित पाँचै जना जनप्रतिनिधिको संयोजन र स्थानीय टोल विकास संस्थाका प्रतिनिधिहरूको सहकार्यमा सञ्चालन भइरहेको छ। सबैको संयुक्त प्रयासबाट वडालाई ‘खाल्डारहित’ बनाउने लक्ष्य लिइएको अध्यक्ष कार्कीको भनाइ छ।