पोखरा । गण्डकी प्रदेश सरकारले आदिकवि भानुभक्त आचार्यको जन्मजयन्तीको अवसरमा आउँदो वर्ष सार्वजनिक बिदा दिने निर्णय गरेको छ । सरकारले २०८२ साल असार २९ गते आइतबारका दिन प्रदेशभर सार्वजनिक बिदा दिने घोषणा गरेको हो ।
यो बिदा गण्डकी प्रदेशभित्रका सबै सरकारी कार्यालय, शैक्षिक संस्था र सार्वजनिक संस्थानहरूमा लागु हुनेछ ।

भानु जयन्तीका अतिरिक्त प्रदेश सरकारले २०८२ सालका लागि अन्य तीनवटा प्रदेशस्तरीय सार्वजनिक बिदा पनि तोकेको छ । सूचनाअनुसार, कोजाग्रत पूर्णिमाको अवसरमा असोज २० गते सोमबार, प्रदेश स्थापना दिवसको दिन माघ २२ गते बिहीबार र चैते दसैँका लागि चैत १२ गते बिहीबार पनि प्रदेशभर बिदा हुनेछ ।

मुख्यमन्त्री तथा मन्त्रिपरिषद्को कार्यालयले २०८१ चैत १५ गते प्रकाशित गरेको सूचनामा, प्रदेश मन्त्रिपरिषद्को चैत १२ गतेको निर्णयअनुसार प्रदेश राजपत्रमा प्रकाशित सूचना बमोजिम यी बिदाहरू तय गरिएको सूचना अधिकारी उपसचिव प्रवीण ढकालले बताए ।