काठमाडौं ।
प्रधानमन्त्री केपी शर्मा ओलीले विकास र समृद्धिका लागि जनसंख्या सन्तुलन आवश्यक रहेको भन्दै युवाहरूलाई समयमै विवाह गरेर सन्तान जन्माउन आग्रह गरेका थिए ।

विश्व जनसंख्या दिवसको अवसरमा स्वास्थ्य तथा जनसंख्या मन्त्रालयले ‘राष्ट्रिय जनसंख्या नीति, २०८२’ सार्वजनिक गर्न आयोजना गरेको एक कार्यक्रममा बोल्दै उनले घट्दो जन्मदरले मानव अस्तित्वमै खतरा निम्त्याउन सक्ने बताएका थिए ।

उनले सरकारले विवाहका लागि २० वर्षको उमेर तोकेको स्मरण गराउँदै ३० वर्षभित्र सन्तान जन्माइसक्न र ‘चालीस कटेपछि रमाउँला’ भन्ने सोच नराख्न युवाहरूलाई सुझाव दिए । ‘पहिले ‘सन्तानले डाँडाकाँडा ढाकुन्’ नभन भनेर जनचेतना फैलाउँदा अहिले उल्टो असर परेर सन्तान नै नपाउने स्थिति आयो,’ उनले भने ।

एकतर्फ जनसंख्याबारे गोष्ठी गर्ने र अर्कोतर्फ आमविनाशका हतियार बनाएर मानिस मार्ने दोहोरो चरित्रले मानव अस्तित्व संकटमा पर्ने उनले बताए । विकसित देशहरूमा समेत जनसंख्या ऋणात्मक हुँदै गएको उदाहरण दिँदै तत्कालीन प्रधानमन्त्री ओलीले जनसंख्याको उचित व्यवस्थापन आवश्यक रहेकोमा जोड दिए ।