काठमाडौँ

 अख्तियार दुरुपयोग अनुसन्धान आयोगले भूमिसुधार तथा मालपोत कार्यालय भक्तपुरका प्रमुख कुमार आचार्य र कार्यालय सहयोगी टिकाराम राउतलाई घुस लिएको आरोपमा नियन्त्रणमा लिएको छ । उनीहरुलाई मंगलबार कार्यालयबाटै २४ लाख ५० हजार रुपैयाँ घुस रकमसहित पक्राउ गरिएको हो ।

आयोगका अनुसार, भक्तपुरको चाँगुनारायण नगरपालिकास्थित १४ रोपनी ४ आना जग्गाको मोही र तलसिङको लगत कट्टा गरी मोहीको नाममा जग्गाधनी प्रमाणपत्र बनाउने प्रयोजनका लागि उनीहरुले घुस मागेको प्रारम्भिक अनुसन्धानबाट खुलेको छ । सोही उजुरीका आधारमा अख्तियारको टोलीले कार्यालयमा छापा मारेको थियो ।

पक्राउ परेका कार्यालय प्रमुख ५४ वर्षीय आचार्य उदयपुरको बेलका नगरपालिका-४ का स्थायी बासिन्दा हुन् भने हाल काठमाडौंको कागेश्वरी मनोहरा नगरपालिका-७ मा बस्दै आएका छन् । त्यसैगरी, ५१ वर्षीय कार्यालय सहयोगी राउत भक्तपुरको चाँगुनारायण नगरपालिका-९ का स्थायी बासिन्दा भई हाल मध्यपुर ठिमी नगरपालिका-१ मा बसोबास गर्छन् ।

अख्तियारले आचार्यको साथबाट दुईवटा मोबाइल पनि बरामद गरेको छ । घटनाको सम्बन्धमा थप अनुसन्धान भइरहेको आयोगले जनाएको छ ।