लेखनाथ ।
पोखरा महानगरपालिका वडा नम्बर २६ को बुढीबजारमा रहेको जलधारे बचत तथा ऋण सहकारी संस्थाले महिला सेयर सदस्यहरूका लागि उद्यमशीलता तालिम प्रदान गरेको छ । महिलाहरूमा ज्ञान र सीप वृद्धि गरी आयआर्जनमा जोडिन सहज बनाउने उद्देश्यले संस्थाले विगतका वर्षहरुमा जस्तै यस वर्ष पनि आफ्ना ३० जना महिला शेयर सदस्यहरूलाई बुकेट बनाउने २ दिने तालिमको आयोजना गरेको हो ।

स्थानीय स्तरमा उपलब्ध कच्चा पदार्थको प्रयोग गरी आयआर्जन गर्न सकिने उद्देश्यले आयोजित तालिमको समापन समारोहमा बोल्दै संस्थाका अध्यक्ष विष्णुप्रसाद बरालले तालिममा सिकेका सीपको प्रयोग गरी व्यावसायिक उत्पादनमा जोडिन आग्रह गरेका थिए ।

लेखनाथ उद्योग वाणिज्य संघकी महासचिव जानुका अधिकारीले महिलाहरूको सीप विकासका लागि संघले समय–समयमा तालिमको आयोजना गरिरहेकाले थप तालिम आवश्यक परेमा संघले सहयोग गर्ने बताएकी थिइन् ।

कार्यक्रम सञ्चालक सिर्जना तिवारीको अध्यक्षतामा भएको उक्त कार्यक्रममा प्रशिक्षार्थीहरूको तर्फबाट खोमकुमारी अधिकारी र पार्वती न्यौपानेले तालिम फलदायी र जीवनउपयोगी भएको प्रतिक्रिया दिएका थिए । प्रशिक्षक मेनुका श्रेष्ठले हस्तकलाका सामग्रीको उत्पादन महत्वपूर्ण भएको र यसका लागि बजारको कुनै समस्या नरहेको बताएकी थिइन् ।

जलधारे बचत तथा ऋण सहकारी संस्थाकी उपाध्यक्ष शारदादेवी बरालले स्वागत मन्तव्य राखेको उक्त कार्यक्रमको सञ्चालन कार्यालय सहायक बिजना ढुंगानाले गरेकी थिइन् ।