पोखरा ।
कास्कीको लुम्ले र पर्वतको पञ्चासे क्षेत्रमा अत्याधिक वर्षा भएपछि जल तथा मौसम विज्ञान विभागको बाढी पूर्वानुमान महाशाखाले नदी तटीय क्षेत्र र डुबान भइरहने होचा भूभागमा बसोबास गर्नेहरूलाई विशेष सतर्कता अपनाउन आग्रह गरेको छ ।
यता, अत्याधिक वर्षासँगै पोखरा महानगरपालिका–१३ स्थित काहुँखोलामा आएको बाढीले ठूलो क्षति पुर्याएको छ । शनिबार राति आएको बाढीले सिद्द्थानदेखि तल घटेखोला पुलसम्मको क्षेत्रमा क्षति पु¥याएको स्थानीयवासीले जनाएका छन् । बाढीका कारण नहर भत्किएको र आसपासका क्षेत्रको भौतिक संरचनामा क्षति पुगेको वडाध्यक्ष किराण बरालले जानकारी दिएका छन् । उनले सबैलाई सतर्क रहन आग्रह गर्दै सहयोगमा जुट्न आह्वान गरेका छन् । ‘सबैजना सतर्क रहौं, सबैले साथ सहयोग गरौं,’ वडाध्यक्ष बरालले आग्रह गरेका छन् । उनका अनुसार खोलामा बनाइएको बाँध फुटेर आएको बाढीले स्थानीयको दुइटा घरको क्षति पुगेकाे छ ।

यस्तै, गण्डकी प्रदेश सभा सदस्य तथा पूर्व ऊर्जा मन्त्री वेदबहादुर गुरुङ श्यामले घटेखोला पुलसम्म ठुलो क्षति पु¥याएको जानकारी दिए । उनले स्थानीय तह, प्रदेश सरकार तथा विपद् व्यवस्थापनसँग सम्बन्धित निकायहरूलाई आवश्यक तत्कालीन राहत तथा पुनःस्थापना कार्यमा जुट्न आग्रह गरेका छन् । उनले सबैलाई सतर्कता अपनाउन आग्रह गरेका छन् ।

लुम्ले र पञ्चासेमा अध्ययाधिक वर्षा भएपछि जल तथा मौसम विभाग महाशाखाले विज्ञप्तिमार्फत भनेको छ, ‘यी क्षेत्र भई बहने स–साना खोलामा आकस्मिक बहाव बढ्न सक्ने र कमजोर तथा भिरालो जमिनमा पहिरोको जोखिम हुन सक्ने भएकाले आवश्यक सतर्कता अपनाऔं ।’ लुम्लेमा बितेको २४ घन्टामा २ सय ४ मिलिमिटर पानी परेको छ भने पर्वतको पञ्चासेमा १ सय ५२ मिलिमिटर पानी परेको जानकारी विभागले दिएको छ । यी दुवै तथ्यांक खतराको संकेत रहेको विभागले जनाएको छ ।

विभागका अनुसार अत्याधिक वर्षा भएपछि नारायणी नदी आसपासका क्षेत्रहरूमा सचेत रहन जरुरी छ । लुम्ले, पञ्चासेसँगै लमजुङको भुजुङ वर्षामापन केन्द्र र वरपरका क्षेत्रमा पनि सावधानी अपनाउन विभागले आह्वान गरेको छ ।