काठमाडौं। नेकपा एमालेभित्र चलिरहेको शक्ति संघर्षमा गण्डकी प्रदेशका अधिकांश केन्द्रीय सदस्यहरूले पार्टी अध्यक्ष केपी शर्मा ओलीलाई समर्थन जनाएका छन्। उनीहरूले पार्टीको सचिवालय र पोलिटब्युरोबाट पारित विधानलाई केन्द्रीय कमिटीले अनुमोदन गर्नुपर्नेमा जोड दिँदै पूर्वराष्ट्रपति विद्यादेवी भण्डारीको सक्रिय राजनीतिमा पुनरागमनले पार्टीलाई क्षति पुग्ने स्पष्ट पारेका छन्।

पार्टीको केन्द्रीय कमिटी बैठकमा गण्डकी प्रदेशबाट प्रतिनिधित्व गर्ने नेताहरूले खुलेरै अध्यक्ष ओलीको लाइनलाई समर्थन गरेका हुन्। यसरी बोल्नेहरूमा प्रदेश अध्यक्ष नवराज शर्मा, केन्द्रीय सदस्यहरू राजीव पहारी, पदम गिरी, सूर्य पाठक, रामशरण बस्नेत र इन्द्रलाल सापकोटा लगायत छन्।

यो घटनाक्रम रोचक छ किनभने पूर्वराष्ट्रपति भण्डारीले आफ्नो राजनीतिक सक्रियताको सुरुवात गण्डकीको पोखराबाटै गरेकी थिइन्। पार्टीको प्रदेश अधिवेशनमा अध्यक्षका लागि भएको प्रतिस्पर्धामा भण्डारीले नवराज शर्मालाई नै सहयोग गरेकी थिइन्। तर, शर्मा निर्वाचित भएपछि शपथ ग्रहण कार्यक्रममा पुगेका अध्यक्ष ओलीले मञ्चबाटै उनको आलोचना गरेका थिए। विगतमा भण्डारीको समर्थन पाएका शर्माले अहिले केन्द्रीय कमिटीमा अध्यक्ष ओलीलाई नै समर्थन गर्नुलाई अर्थपूर्ण रूपमा हेरिएको छ।

गण्डकी प्रदेशमा एमालेभित्र उपमहासचिव पृथ्वीसुब्बा गुरुङ र स्थायी कमिटी सदस्य खगराज अधिकारी निकट दुई गुट क्रियाशील छन्। संघीयता कार्यान्वयनका क्रममा अध्यक्ष ओलीसँग फरक मत राखेका गुरुङ पनि पछिल्लो समय ओलीसँग निकट मानिन्छन्। यसले गण्डकी प्रदेशमा अध्यक्ष ओलीको पकड बलियो रहेको संकेत गर्छ।

केन्द्रीय कमिटी बैठकमा सहभागी एक नेताका अनुसार, भण्डारीको राजनीतिक पुनरागमनको विषयले बैठकमा चर्को बहस सिर्जना गरेको छ र बोल्ने अधिकांश सदस्यहरू ओलीकै पक्षमा देखिएका छन्।