पोखरा ।
अध्ययन केन्द्रका साथै सिकाइका विविध पाटालाई समेटेको पोखरा महानगरपालिका वडा नं २९ मा रहेको दीपशिखा सामुदायिक पुस्तकालयमा यस वर्ष टेक एज युथ परियोजना सञ्चालन गरिने भएको छ ।

रिड नेपाल अन्र्तगतको टेक एज युथ परियोजना र दीपशिखा सामुदायिक पुस्तकालयबिच परियोजना सञ्चालन गर्ने सम्बन्धमा सम्झौता पत्रमा बिहीबार हस्ताक्षर भएको छ । पुस्तकालयको सभाहलमा आयोजित एक कार्यक्रमका बिच पुस्तकालयका तर्फबाट अध्यक्ष कृष्णहरि भण्डारी र परियोजनाका तर्फबाट रिड नेपालकी कार्यक्रम संयोजक भाग्यश्री विष्टको उपस्थितिमा हस्ताक्षर गरिएको हो ।

सम्झौता अनुसार परियोजनाबाट लक्षित समुदायका बिद्यालय बाट पिछडिएका, प्रविधिको पहुच नपुगेका १३ देखि २२ वर्षसम्मका अध्ययन गदै वा अध्ययन गर्न छोडेका किसोरकिसोरी र फरक क्षमता भएका समेत समेटिने गरी प्रत्यक्ष रुपमा ५५ जना लाभान्वित हुने भएका छन् ।

कार्यक्रममा पोखरा महानगरपालिका वडा नं २९ का वडाध्यक्ष श्रीप्रसाद गुरुङले वडाको तर्फबाट सहयोग गर्न तयार रहेको बताए । कार्यक्रममा पोखरा महानगरपालिकाका कार्यपालिका सदस्य निर्मला पौडेल, लेखनाथ पत्रकार मञ्चका अध्यक्ष विष्णुहरि पौडेल, जनप्रकाश माविका प्रधानाध्यापक शेखरनाथ शर्मा, गोगन माविका प्रधानाध्यापक मोहनराज बराल लगायतले बोलेका थिए । ८ लाख रुपैया खर्च हुने उक्त कार्यक्रमका लागि परियोजनाले ४ लाख बराबरको खर्च गर्ने छ ।