पोखरा । नेपालको अग्रणी होटल समूह सोल्टी होटेल्स एण्ड रिसोट्र्सले पर्यटकीय नगरी पोखरामा आफ्नो उपस्थिति विस्तार गरेको छ । समूहले आफ्नो ‘वेस्टेण्ड’ ब्राण्डअन्तर्गत ‘सोल्टी वेस्टेन्ड लेकसाइड, पोखरा’ को व्यवस्थापन तथा सञ्चालन गर्ने भएको हो । यसका लागि सोल्टीले होटेल पेनिन्सुला प्रा.लि.सँग व्यवस्थापन सम्झौतामा हस्ताक्षर गरेको छ ।

पोखराको लेकसाइडमा फेवातालबाट केही मिनेटको दूरीमा अवस्थित यो होटेल सन् २०२५ को सेप्टेम्बरदेखि बुकिङका लागि खुला गरिनेछ । होटेलमा एउटा प्रेसिडेन्सियल सुइट र ६ वटा जुनियर सुइटसहित कुल ७७ वटा प्रिमियम अतिथि कोठाहरू रहने विज्ञप्तिमा उल्लेख छ । पाहुनाहरूलाई आधुनिक तथा उत्कृष्ट सेवा प्रदान गर्ने लक्ष्यसहित कोठाहरू डिजाइन गरिएका छन् ।

होटेलमा अन्नपूर्ण श्रृंखलाको दृश्यावलोकन गर्न सकिने रुफटप बार, २ सय ५० जना क्षमताको सभाहल, स्वीमिङ पुल, हेल्थ क्लब, स्पा तथा पर्याप्त पार्किङजस्ता सुविधाहरू उपलब्ध हुनेछन् । होटेलले पारिवारिक, व्यावसायिक तथा अन्य सबै प्रकारका पर्यटकहरूको आवश्यकतालाई सम्बोधन गर्ने लक्ष्य राखेको छ ।

होटेल व्यवस्थापनसम्बन्धी सम्झौतामा सोल्टी होटेल लिमिटेडका तर्फबाट उपाध्यक्ष सुदर्शन चापागाईं र होटेल पेनिन्सुला प्रालिका संस्थापक तथा कार्यकारी अध्यक्ष खिमबहादुर ढकालले हस्ताक्षर गरेका हुन् ।

सोल्टी होटेल्सका उपाध्यक्ष सुदर्शन चापागाईंले यो साझेदारी नेपालका उत्कृष्ट पर्यटकीय गन्तव्यहरूमा स्थापित हुने समूहको दीर्घकालीन लक्ष्यको प्रतिबिम्ब भएको बताए । उनले सोल्टी वेस्टेन्ड लेकसाइड, पोखराले समकालीन वास्तुकला, आत्मीय सेवा र स्थानीय सांस्कृतिक अनुभवको संयोजनमार्फत सोल्टी ब्राण्डको विशिष्टतालाई जीवन्त बनाउने विश्वास व्यक्त गरे ।

यो नयाँ विस्तारसँगै सोल्टी होटेल्सले गण्डकी प्रदेशमा आफ्नो उपस्थिति थप सुदृढ बनाएको छ र यसले पोखराको प्रतिस्पर्धी बजारमा अतिथि तथा पर्यटकहरूका लागि एक नयाँ र विशिष्ट विकल्प प्रस्तुत गर्ने अपेक्षा गरिएको छ ।