पोखरा ।
प्रत्यक्ष निर्वाचित कार्यकारी राष्ट्रपतिको व्यवस्था गर्नुपर्ने मागसहित नेपाल समाजवादी पार्टी (नयाँ शक्ति)ले प्रधानमन्त्रीलाई ज्ञापनपत्र बुझाएको छ । गण्डकी प्रदेश संयोजक नेत्र चापागाईंको नेतृत्वमा उक्त ज्ञापनपत्र जिल्ला प्रशासन कार्यालय कास्कीमार्फत प्रधानमन्त्री केपी शर्मा ओली पठाएका हुन् । उनीहरुले सिडिओ रुद्रादेवी शर्मालाई उनीहरुले ज्ञापन पत्र बुझाएका हुन् ।

ज्ञापनपत्रमा वर्तमान राजनीतिक प्रणालीले देशको विकास, सुशासन र जनताको प्रतिनिधित्व सुनिश्चित गर्न नसकेको दाबी गरिएको छ । पार्टीले भनिएको छ, ‘लोकतन्त्र सिमित र औपचारिक बन्दै गएको छ। लोकतन्त्रको नाममा दलतन्त्र, दलतन्त्रको नाममा नेतातन्त्र, नेतातन्त्रको नाममा शीर्ष नेताको सिन्डिकेट हाबी भएको छ ।’

पार्टीका अनुसार देशको अग्रगमन र राजनीतिक स्थायित्वका लागि अब प्रत्यक्ष निर्वाचित कार्यकारी राष्ट्रपतिको आवश्यकता छ । प्रत्यक्ष निर्वाचित मुख्यमन्त्री, संसदमा पूर्ण समानुपातिक प्रतिनिधित्व र विज्ञता एवं दक्षताका आधारमा मन्त्रिमण्डल गठन गर्नुपर्ने पनि माग गरिएको छ ।

ज्ञापनपत्रमा भ्रष्टाचार, बेरोजगारी, सार्वजनिक सेवाप्रति जनताको विश्वासमा आएको गिरावट, संवैधानिक निकायहरूमा दलगत भागबण्डा र लोकतान्त्रिक संस्थाहरूको कमजोर स्थितिप्रति गम्भीर चिन्ता व्यक्त गरिएको छ । ‘वार्षिक लाखौं युवाहरू रोजगारीको खोजीमा विदेशिन बाध्य छन्, सार्वभौम नागरिक निरीह, रमिते र आजित भइरहेका छन्,’ ज्ञापनपत्रमा भनिएको छ ।

ज्ञापनपत्रमा प्रत्यक्ष निर्वाचित कार्यकारी राष्ट्रपतिको व्यवस्था, प्रत्यक्ष निर्वाचित मुख्यमन्त्री प्रणाली, संसदमा पूर्ण समानुपातिक प्रतिनिधित्व, नागरिकलाई ‘राइट टु रिजेक्ट’ र ‘राइट टु रिकल’ को व्यवस्था, सुशासन, सदाचार र समावेशी विकास, मौलिक हकहरूको निशर्त कार्यान्वयन, उच्च पदस्थ व्यक्तिहरूको सम्पत्ति छानबिन र शक्तिशाली जनलोकपालको गठन, प्रविधियुक्त जनमैत्री कर्मचारी प्रशासन, न्यायालयको पुनःसंरचना, संवैधानिक निकायमा दलगत भागबण्डाको अन्त्य हुनुपर्ने माग गरिएको छ । आत्मनिर्भर अर्थतन्त्रमार्फत स्वरोजगारमा जोड तथा विदेशमा रहेका नेपाली नागरिकलाई मताधिकार सुनिश्चित गर्नुपर्ने मागहरू उठाइएका छन् । गण्डकी प्रदेशसँग सम्बन्धित केही ठूला पूर्वाधार र विकास योजनालाई पनि ज्ञापनपत्रमा समेटिएको छ । त्यसअन्तर्गत गोरखकाली रबर उद्योग पुनः सञ्चालन, वुढीगण्डकी जलविद्युत आयोजनाको शीघ्र निर्माण, पोखरा अन्तर्राष्ट्रिय विमानस्थलको नियमित सञ्चालन, पोखरा बसपार्क निर्माण तथा मध्यपहाडी लोकमार्ग निर्माणमा भएको ढिलाइ अन्त्य गर्न आग्रह गरिएको छ ।

‘अब आँखा खोलौं’ अभियानमार्फत देशभर वैचारिक रूपान्तरण, जनचेतना र वैकल्पिक शक्तिको निर्माणमा केन्द्रित हुने योजना पार्टीको छ। उनले भने, ‘अबको दशक विचार र एजेण्डासहितको वैकल्पिक शक्तिको दशक बनाउनु आवश्यक छ,’ संयोजक चापागाईंले भने । पार्टीले देशको राजनीतिक पुनःसंरचना र संविधान संशोधनको आवश्यकतालाई जोड दिँदै सबै सरोकारवालालाई वैकल्पिक आन्दोलनमा सहभागी हुन आह्वान गरेको छ ।