पोखरा 

नेपाल अडिटेर्स एसोसियसन (अडान) जिल्ला कार्य समिति, कास्कीले आफ्नो २० औं स्थापना दिवस सामाजिक सेवाका काम गरेर मनाएको छ । स्थापना दिवसको अवसरमा समितिले पोखराको हेमजामा रहेको मानवसेवा आश्रममा आश्रितहरुका लागि भोजन सेवा प्रदान गर्नुका साथै आश्रम परिसरमा वृक्षारोपण गरेको छ ।

अडान कास्कीले आफ्नो व्यावसायिक उत्सवलाई मानवीय सेवामा समर्पित गर्दै आश्रममा आश्रित करिब एक सय जनालाई बिहानको विशेष भोजन गराएको थियो । भोजन सेवापछि संस्थाका केन्द्रीय तथा जिल्लास्तरीय पदाधिकारीहरुले आश्रम परिसरमा विभिन्न प्रजातिका बिरुवा रोपेर वातावरणीय सन्देश पनि दिएका छन् ।

कार्यक्रममा अडानका केन्द्रीय अध्यक्ष गुणानिधि पाण्डेले व्यावसायिक संस्थाहरुले आफ्नो सामाजिक उत्तरदायित्व बिर्सन नहुने बताए । उनले भने, ‘लेखापरीक्षकहरुको काम आर्थिक पारदर्शिता र सुशासन कायम गर्नु मात्र होइन, समाजप्रति पनि हाम्रो गहिरो उत्तरदायित्व छ । अडान कास्कीले आफ्नो स्थापना दिवसलाई यसरी मानवीय सेवासँग जोडेर उदाहरणीय काम गरेको छ, यसले हामी सबैलाई प्रेरणा दिएको छ ।’ उनले अडानले देशभर नै यस्ता रचनात्मक र सामाजिक कार्यलाई प्रोत्साहन गरिरहेको जानकारी दिए ।

उक्त कार्यक्रममा संस्थाका केन्द्रीय उपाध्यक्ष चन्द्रबहादुर सुवेदी, केन्द्रीय उपमहासचिव शिवराज बराल, केन्द्रीय सदस्यहरु रुद्रनाथ पौडेल र पदमबन्धु पोखरेल लगायतका केन्द्रीय पदाधिकारीहरुको उपस्थिति थियो । उनीहरुको उपस्थितिले जिल्ला समितिको कार्यक्रमलाई थप महत्व दिएको थियो ।

अडान कास्कीका एक पदाधिकारीले २० औं वार्षिकोत्सव कुनै औपचारिक कार्यक्रममा मात्र सीमित नराखी समाजका लागि केही योगदान गरेर मनाउने सोचअनुसार कार्यक्रम आयोजना गरिएको बताए । उनले भने, ‘मानवसेवा आश्रममा आश्रित आमाबुबा तथा बालबालिकासँग बसेर खुसी साट्दा र आश्रम परिसरमा हरियाली थप्न वृक्षारोपण गर्दा हामीलाई आत्मिक शान्ति मिलेको छ ।’

कार्यक्रममा अडान कास्कीका पदाधिकारी, सदस्यहरु तथा अन्य शुभचिन्तकहरुको उल्लेख्य सहभागिता थियो । सहभागीहरुले व्यावसायिक संघसंस्थाले आफ्नो वार्षिकोत्सव जस्ता विशेष दिनमा फजुल खर्च गर्नुभन्दा यस्ता सामाजिक कार्यमा लगानी गर्नु अनुकरणीय भएको बताए ।