तनहुँ । तनहुँको आँबुखैरेनी गाउँपालिका-२ ऐनापहरामा बस दुर्घटना हुँदा पाँच जना घाइते भएका छन् । पृथ्वी राजमार्गमा आज दिउँसो करिब ४:२० बजे ग २ ख १०७७ नम्बरको बस दुर्घटनामा परेको हो ।

घाइतेमध्ये गोरखाको सहिद लखन गाउँपालिका-६ की ४० वर्षीया सुनु थापाको अवस्था गम्भीर छ । उनलाई आँबुखैरेनी अस्पतालमा सामान्य उपचारपछि थप उपचारका लागि चितवन मेडिकल कलेज (सीएमसी) पठाइएको प्रहरीले जनाएको छ ।

दुर्घटनामा गोरखा नगरपालिका-९ का ५४ वर्षीय सनबहादुर गुरुङको अवस्था मध्यम छ । यस्तै, गोरखाको सहिद लखन गाउँपालिका-६ की ४३ वर्षीया सिता थापा, सोही ठाउँकी २८ वर्षीया मिना थापा र तनहुँको आँबुखैरेनी गाउँपालिका-१ की ७ वर्षीया खुशी रामदामको अवस्था सामान्य छ ।

सामान्य र मध्यम अवस्थाका घाइतेहरुको आँबुखैरेनी अस्पतालमा उपचार भइरहेको छ । बसमा सवार अन्य यात्रु भने सकुशल छन् । दुर्घटनाको कारणबारे थप अनुसन्धान भइरहेको प्रहरीले जनाएको छ ।