पोखरा ।
लोकगायक पशुपति शर्मा बुधबार स्याङ्जामा भएको एक सवारी दुर्घटनामा घाइते भएका छन् । पोखरादेखि वालिङतर्फ जाने क्रममा उनी चढेको कार दुर्घटनामा परेको हो ।

जिल्ला प्रहरी कार्यालय स्याङ्जाका अनुसार, ग १ च ४१७१ नम्बरको उक्त कार सिद्धार्थ राजमार्गको भीरकोट नगरपालिका–२ स्थित एक कल्भर्टमा ठोक्किन पुगेको थियो । दुर्घटना हुँदा शर्मासहित गाडीमा जम्मा चार जना सवार रहेको प्रहरीले जानकारी दिएको छ ।

उनी एक सांगीतिक कार्यक्रममा सहभागी हुनका लागि स्याङ्जा पुगेका थिए । उक्त दुर्घटनामा शर्माको देब्रे हातको एउटा औंला भाँचिएको छ भने कारमा सामान्य क्षति पुगेको छ ।

आफ्नो स्वास्थ्य अवस्थाबारे जानकारी दिँदै शर्माले भने, ‘कार घुम्तीमा अनियन्त्रित भएर नालीमा खसेको हो, मेरो एउटा औंला भाँचियो तर अरू ठूलो चोट छैन, मसँगै रहेका अरू साथीहरू पनि सामान्य अवस्थामा छन् ।’