पोखरा ।
अहिले तीजमा चेलीलाई माइत लिन जाने समय हरायो । टाढाको बाटो, झरी र उर्लेको खोला तरेर चेली लिन जाने समय थियो, एकताका । अचेत टेलिफोनको भरमा चेलीलाई तीजमा बोलाउन थालियो । समय फेरियो, शैली पनि फेरियो । तर, कलाकारहरुले भने गीतमार्फत पुरानो संस्कारलाई सम्झना दिलाइरहेका हुन्छन् ।

तीजलाई मौलिकता प्रदान गर्ने क्रममा पोखरामा रहेर संघर्ष गरिरहेका गायक गायिकाहरुले ‘जूनकिरी’ तीज गीत मार्फत पुराना संस्कारलाई उजागर गरेका छन् । माइतीको बाटो हेरेर बसेकी चेलीलाई भाई लिन जाँदाको खुशी, सासुको कचकच र श्रीमानको साथलाई गीतमा उतारिएको छ ।

गीत रमेश थापामगर, रेशम थापा मगर, बत्ती थापा मगर, आयुसा परियार, सानु जोजिजू र आरोही सुनारले गाएका छन् । गीतमा सन्तोष सुवेदीको संगीत छ भने रमेश थापा मगरले गीतको शब्द लेखेका हुन् । दिवश थापा मगरले गीतको एरेन्ज गरेका हुन् ।

गायक रमेश थापा मगरको निर्देशनमा तयार भएको भिडियोमा शोभा थापा मगर, सुविग गुरुङ, रोशन सोनी, स्वयता परियार, बत्ती थापा मगर र सानु जोजिजूको अभिनय रहेको छ । गणेश सापकोटाले खिचेका भिडियोलाई सुवास अम्गाईले सम्पादन गरेका छन् । गीतको भिडियो रमेश थापा युटुबबाट बजारमा आएको छ ।