तनहुँ ।

खानेपानी तथा सरसफाइ डिभिजन कार्यालयले तनहुँ र नवलपुर गरी दुई जिल्लामा ३१ हजार ३२८ निजी धारा जडान गरेको छ ।

कार्यालयका अनुसार तनहुँमा सत्र हजार ९२७ र नवलपुरमा १३ हजार चार सय एक वटा धारा जडान गरिएको हो । जिल्लामा हालसम्म ९२ प्रतिशतभन्दा बढी नागरिकमा शुद्ध खानेपानीको पहुँच पुऱ्याइएको डिभिजन कार्यालयकी इन्जिनियर बिनु लोहनीले जानकारी दिइन् । उनका अनुसार आर्थिक वर्ष २०८१/८२ मा चार हजार ६३४ नयाँ धारा जडान गरिएका छन् ।

लोहनीले भनिन्, ‘आर्थिक वर्ष २०८२/८३ मा छ हजार ५०० नयाँ धारा जडान गर्ने लक्ष्य राखिएको छ । शतप्रतिशत घरमा खानेपानी सेवा पुऱ्याउने लक्ष्यसहित कार्यालयले काम गरिरहेको छ ।’

उनका अनुसार संघीय सरकारबाट ससर्त अनुदानमा रु २८ करोड र प्रादेशिक खानेपानी आयोजनातर्फ रु ३५ करोड ८० लाख बजेट खर्च गरिएको छ । यसैगरी पुँजीगततर्फ संघ विशेष अनुदानतर्फ रु ४४ करोड २० लाख बजेट विनियोजन भएको पनि उनले जानकारी दिइन् । रासस