पोखरा ।
पोखरा २५ हेमजा निवासी मिर्गाैला पीडित २७ वर्षीया ओसना विकलाई नेकपा (माओवादी केन्द्र)ले आर्थिक सहयोग गरेको छ । म्याग्दीको धवलागिरी गाउँपालिका २ लुलाङ स्थायी घर भई हाल हेमजामा भाडाको घरमा बस्दै आएकी विकलाई माओवादीको पोखरा महानगर कमिटी र वडा कमिटीबाट संकलित रकम हस्तान्तरण गरिएको वडा कमिटी अध्यक्ष महादेव अधिकारीले जानकारी दिए ।

धौलागिरी कास्की दलित सम्पर्क समाजले गरेको वार्षिक साधारण सभामा वडा कमिटी अध्यक्ष महादेव अधिकारीले नगद ६ हजार विकलाई हस्तान्तरण गरे । विगत २ महिनादेखि दुवै मृगौलामा समस्या देखिएपछि विकले सहयोगको याचना गरेकी छन् ।

दैनिक मजदुरी गरी जीविकोपार्जन गर्दै आएको उनको परिवार थप उपचार गर्न सक्ने अवस्थामा नभएकाले सहयोगका लागि सम्पर्क समाजले आग्रह गरेको छ ।

पोखराको मणिपाल र काठमाडौंको नेसनल किड्नी अस्पतालमा उपचार गराउँदा चल अचल सम्पत्ति सकिएको र थप उपचारका लागि रकम अभावले रोगले पीडित परिवार थप पिडित बनेको आफन्त डिलसरा नेपालीले बताइन् । सहयोगको अपेक्षासहित पीडितको नाममा प्रभु बैंकमा ०१३०२३३३७२६०००१७ नम्बरको खाता खोलिएको छ ।