पोखरा । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले पार्टीभित्र अनुशासनहीनता र गुटगत प्रवृत्तिलाई अब कुनै हालतमा सहन नगर्ने बताएका छन् । अखिल नेपाल ट्रेड युनियन महासंघ गण्डकी प्रदेश समितिले बिहीबार पोखरामा आयोजना गरेको वैचारिक तथा राजनीतिक प्रशिक्षण कार्यक्रममा बोल्दै उनले माओवादी केन्द्रलाई सबल बनाउन दृढता, एकता र संगठनात्मक विस्तार अपरिहार्य रहेको स्पष्ट पारे ।

अध्यक्ष दाहालले पार्टीका निर्णय र नीतिबाट विमुख हुने वा नेतृत्वविरुद्ध उभिनेहरू कारवाहीको दायरामा पर्ने चेतावनी दिए । उनले भने, ‘आफ्नै खुट्टामा बन्चरो हान्ने बाटोमा कोही पनि लाग्न हुँदैन । नियम, अनुशासन र मार्गनिर्देशन विपरीत जानेलाई अब छुट दिइँदैन ।’ उनले माओवादी आन्दोलनकै जगमा देशमा आएको राजनीतिक परिवर्तन सम्भव भएको दाबी गर्दै गणतन्त्र र समाजवादलाई संस्थागत गर्न अझै ठूलो संघर्ष आवश्यक रहेको दाबी गरे ।

अहिलेका उपलब्धि सुरक्षित राख्न नेता तथा कार्यकर्ता घर–घर पुगेर जनतालाई अभिप्रेरित गर्नुपर्ने उनको भनाइ छ । अध्यक्ष दाहालले समाजवादी शक्तिहरूलाई एउटै मोर्चा, र परिस्थिति अनुसार एउटै पार्टीमा समेत एकीकृत गर्ने प्रयास अघि बढाउने खुलासा गरे । ‘हामीसँग बलियो विकल्प निर्माण गर्ने क्षमता छ, त्यसैले समाजवादी धारलाई विखण्डन होइन, एकतालाई जोड दिनुपर्छ,’ उनले भने ।

दशैं–तिहारपछि बस्ने केन्द्रीय समिति बैठकले संगठन विस्तार र उत्पादन वृद्धिलाई मुख्य प्राथमिकतामा राख्दै विस्तृत कार्ययोजना ल्याउने उनको भनाइ छ । मंसिरदेखि विकृतिविरुद्ध सडक आन्दोलन र राष्ट्रिय समस्याहरू समाधानका लागि सदन तथा सडक दुवैतर्फबाट पहल गरिने उनले जनाए ।

सामाजिक सुरक्षा कोषको सुरुवात आफ्नो नेतृत्वकालमै भएको स्मरण गर्दै अध्यक्ष दाहालले सबै मजदुरलाई सो कोषमा सहभागी गराउन जरुरी रहेको उल्लेख गरे । साथै, न्यूनतम पारिश्रमिक सुनिश्चित गर्ने, योगदानमा आधारित सामाजिक सुरक्षा प्रणालीलाई प्रभावकारी बनाउने र ठेकेदारी प्रणाली अन्त्य गर्नुपर्नेमा उनले जोड दिए । अध्यक्ष दाहालले मजदुर आन्दोलनलाई यिनै विषयसँग जोडेर अघि बढाउनुपर्ने धारणा राखे ।

पूर्वप्रधानमन्त्रीसमेत रहेका दाहालले अबको ध्यान संगठनात्मक सबलीकरणसँगै उत्पादन वृद्धिमा रहने पुनः स्पष्ट पारे । उनले पार्टीका नेता तथा कार्यकर्तालाई श्रमिक, किसान र जनताको जीवनस्तर उकास्ने कार्यमा प्रत्यक्ष जोडिन आह्वान गरे ।