पोखरा । गण्डकी प्रदेश स्तरीय कृषि तीज गीत प्रतियोगिताको उपाधि गोरखाले जितेको छ । पब्लिक फोरके टेलिभिजनको आयोजना एवं प्रदेश कृषि, भूमि व्यवस्था तथा सहकारी मन्त्रालयको समन्वयमा बिहीबार भएको प्रतियोगिताको उपाधि गोरखाले जितेको हो ।
उपाधिसँगै गोरखाले ५५ हजार ५ सय ५५ रुपैयाँसहित प्रमाणपत्र हात पा¥यो । कास्कीले दोस्रो र पर्वतले तेस्रो स्थान हाँसिल गरे । दोस्रो हुने कास्कीले ३३ हजार ३ सय ३३ र तेस्रो हुने पर्वतले २२ हजार २ सय २२ रुपैयाँ प्राप्त गरे । बागलुङ र स्याङ्जा सान्त्वना बने । उनीहरुले समान ११ हजार १ सय ११ हजार रुपैयाँ पाए ।

प्रतियोगितामा गण्डकी प्रदेशका मनाङ र मुस्ताङ बाहेकका जिल्लाले सहभागिता जनाएका थिए । म्याग्दी, तनहुँ र नवलपुरका सहभागी नृत्य र भेषभूषातर्फ उत्कृष्ट बने । उनीहरुले सारी पुरस्कार पाए । पुरस्कृतलाई गण्डकी प्रदेशकी कार्यवाहक मुख्यमन्त्री पद्मा जिसी श्रेष्ठ र पब्लिक टेलिभिजनका अध्यक्ष सविन भट्टले नगद र प्रमाणपत्र हस्तान्तरण गरे ।

कार्यक्रममा टेलिभिजनले पोखरा महानगरपालिका १६ का गन्धर्व आमा समूहलाई मौलिक तीज गीत संरक्षणमा योगदान दिएको भन्दै नगद २५ हजारसहित सम्मान गरेको छ । उनीहरुलाई पोखरा महानगरपालिकाका मेयर धनराज आचार्यले नगदसहित सम्मानपत्र हस्तान्तरण गरे । कार्यक्रममा चर्चित कलाकार राजु परियार, प्रजापती पराजुली, सुशीला गौतम, राजन कार्की, सरला पाण्डे लगायतका कलाकारको प्रस्तुति रह्यो ।

कार्यक्रममा गण्डकी प्रदेशकी कार्यवाहक मुख्यमन्त्री श्रेष्ठले प्रदेश समुन्नत बनाउने आधार कृषि भएकाले कृषिलाई पर्यटकसँग जोड्न सकिएमात्रै प्रदेश समुन्नत हुने बताइन् । गीतमा समावेश भएका विषयवस्तु सचेतना फैलाउने खालेको भएको जिसीले उल्लेख गरिन् । आगामी दिनमा सचेतना फैलाउने र महिला शसक्तिकरणको कार्यक्रम अघि बढाउने उनले प्रतिवद्धता जनाइन् ।