पोखरी ।
शैक्षिक नेतृत्व विकास गर्ने र विद्यालयसँगको सहकार्यलाई मजबुत बनाउने उद्देश्यले पोखरास्थित गुप्तेश्वर महादेव बहुमुखी क्याम्पसले ‘शिक्षा क्षेत्रको भविष्यको लागि गतिशील नेतृत्व’ शीर्षकमा कार्यशाला गोष्ठी आयोजना गरेको छ । कास्की र स्याङ्जाका २५ निजी तथा सरकारी विद्यालयका प्रधानाध्यापकसहित ५३ जना शिक्षकको गोष्ठीमा सहभागिता थियो ।
कार्यशालामा त्रिभुवन विश्वविद्यालयका प्रा.डा. प्रदिपचन्द्र गौतमले विद्यालयका अवसर, चुनौती, लक्ष्य, उद्देश्य र नेतृत्वमा हुनुपर्ने गुणबारे सहजीकरण गरेका थिए । अर्का सहजकर्ता आदिकवि भानुभक्त क्याम्पसका सह–प्राध्यापक महाप्रसाद हड्खलेले क्याम्पस र विद्यालयबीच सहकार्य हुनुपर्नेमा जोड दिए ।

कार्यक्रममा क्याम्पस सञ्चालक समितिका अध्यक्ष श्रीराम सुवेदीले यस क्षेत्रमा उच्च शिक्षालाई सहज र पायक बनाउन समुदायले क्याम्पस स्थापना गरेको बताए । क्याम्पस प्रमुख धर्मराज बरालले शिक्षालाई गुणस्तरीय बनाउन विद्यालयहरूसँग समयअनुसार छलफल र सहकार्य गर्दै जाने प्रतिबद्धता जनाए ।

छोरेपाटन माविका प्रधानाध्यापक डिल्लीराज शर्माले कार्यशालाबाट नेतृत्व विकाससम्बन्धी पर्याप्त ज्ञान मिलेको बताए । पद्युम्न पनेरु माविका प्रधानाध्यापक दिप्तिनारायण शर्माले आफ्नो जीवनकै उत्कृष्ट कार्यक्रममा सहभागी हुन पाउँदा खुसी लागेको बताउँदै क्याम्पससँग सहकार्य गर्न तयार रहेको उल्लेख गरे । एक्स आर्मी पब्लिक माविका प्रधानाध्यापक मोहनलाल पौडेलले पनि क्याम्पससँग सहकार्य गर्दै जाने धारणा राख्दै कार्यक्रम सफल भएको बताए ।

कार्यक्रममा इ.ओ.सि. संयोजक दुर्गानाथ पौडेलले स्वागत मन्तव्य दिएका थिए भने आइ.क्यू.ए.सी. संयोजक राजकुमार सुवेदीले क्याम्पसका गतिविधिबारे जानकारी गराएका थिए । कार्यक्रमको सञ्चालन सहायक क्याम्पस प्रमुख मोहन भण्डारीले गरेका थिए ।