स्याङ्जा ।

नेपाली कांग्रेसका उपसभापति तथा पूर्वमन्त्री धनराज गुरुङले नेताहरूका खोक्रा भाषण र आश्वासनले युवा पलायनको विकराल समस्या समाधान नहुने बताउनुभएको छ । देशमा रोजगारीका अवसर सिर्जना गर्न नसक्ने तर भाषणमा मात्रै युवालाई रोक्ने कुरा गर्नुको कुनै अर्थ नहुने उहाँको भनाइ थियो ।

शुक्रबार श्री कालिका पुस्तकालयले स्याङ्जाको भिरकोटमा आयोजना गरेको तीज गीत प्रतियोगिता कार्यक्रममा बोल्दै उहाँले युवालाई भाषण नभई देशमै भविष्य देख्ने आधार चाहिएको बताउनुभयो । नेताहरूले माइक पाउनासाथ एकअर्कालाई गालीगलौज गर्ने प्रवृत्तिले देश विकासमा अवरोध पुगेको उहाँले टिप्पणी गर्नुभयो । ‘हामी माइक पाउन साथ एक नेताले अर्को नेतालाई गाली गर्ने प्रवृत्ति बढेको छ,’ गुरुङले भन्नुभयो, ‘यसले देश विकासमा पनि अवरोध गरेको छ ।’

देशलाई समृद्ध बनाउन सके मात्र युवा पलायन रोकिने भन्दै उहाँले जडीबुटी, पर्यटन र कृषि जस्ता क्षेत्रमा सरकारले ठोस लगानी र योजना ल्याउनुपर्नेमा जोड दिनुभयो । युवाहरूको विदेशिने बाध्यतालाई इंगित गर्दै उहाँले भन्नुभयो, ‘बुबा, आमा, भर्खर बिहे गरेकी श्रीमती छोडेर रुँदै विदेशिने रहर कसैलाई हुँदैन । युवालाई भाषणभन्दा पनि रोजगारीको खाँचो छ ।’

कार्यक्रममा उहाँले स्याङ्जाको विकास निर्माणका विषयमा पनि जानकारी गराउनुभयो । सिद्धार्थ राजमार्गलाई ‘डेडिकेटेड डबल लेन’ मा स्तरोन्नति गर्ने प्रक्रिया अन्तिम चरणमा पुगेको र छिट्टै काम सुरु हुने उहाँले बताउनुभयो । ‘सिद्धार्थ राजमार्गको स्तरोन्नति गर्ने प्रक्रिया द्रुत गतिमा अगाडि बढेको छ,’ उहाँले भन्नुभयो । साथै, स्याङ्जाका जोखिमयुक्त ग्रामीण सडकलाई सुरक्षित बनाउने अभियान पनि निरन्तर चलिरहेको गुरुङले जानकारी दिनुभयो ।

विकास कुनै एक व्यक्ति वा दलले मात्रै गर्न नसक्ने भन्दै उहाँले सबै राजनीतिक दल, नागरिक र सरकारको साझा प्रयासबाट मात्रै देश बन्ने धारणा राख्नुभयो ।