पोखरा । हरितालिका तीज पर्वको अवसरमा लायन्स इन्टरनेसनल जिल्ला ३२५ जे नेपालले पोखरामा आयोजना गरेको ‘तीज फेलोसिप कार्यक्रम’मा लोकप्रिय लोकगायिका हरिदेवी कोइरालालाई सम्मान गरिएको छ ।

नेपाली मौलिक संस्कृति र साहित्यको उन्नयनमा महत्वपूर्ण भूमिका खेलेको भन्दै तीज पर्वको अवसरमा कोइरालालाई सम्मान गरिएको हो । कोइरालाले तीजको मौलिकता, संस्कृतिको निरन्तरता र महिलाको सशक्तीकरणमा गीत संगीत भूमिकाको चर्चा गरिन् । उनले मौलिक संस्कृति बचाउन लायन्स जस्ता सामाजिक संघ, संस्थाको भूमिका अझ महत्वपूर्ण हुने धारणा राखिन् ।
मल्टिपल काउन्सिल चेयर पर्सन लायन मिलन थापाले तीजलाई केवल मनोरञ्जनमा मात्र सीमित नगरी सामाजिक एकता, लंैगिक समानता र सशक्तीकरणको रुपमा विकास गर्दै सामाजिक सद्भाव सहित मनाउन पर्नेमा जोड दिइन् । उनले लायन्सले सेवा भावसँगै मौलिक परम्परा, संस्कृति संरक्षण र प्रवद्र्धनमा योगदान दिदै आएको बताइन् ।
लायन्स अन्तर्राष्ट्रियकागभर्नर मिलन बाबु मल्लले लायन्स क्लबले समाजसेवा र सांस्कृतिक सहभागितामा जोड दिएको बताए । पत्रकार महासंघ गण्डकी प्रदेश महासचिव जमुना वर्षा शर्माले महिलाको पहिचान, अधिकार र आत्मसम्मानलाई बलियो बनाउँदै लैजान सकेमात्र समाज समृद्ध हुने धारणा राखिन् ।

तीज जस्ता सांस्कृतिक पर्वहरूले महिलालाई आफ्नो भावना अभिव्यक्त गर्न, आत्मबल वृद्धि गर्न र समानताको आवाज बुलन्द गर्न सशक्त मञ्च गर्ने उनको धारणा छ । डिस्ट्रिक्ट फेलोसिप चिफ सबि शेरचनले महिलाको अधिकार र सांस्कृतिक पहिचान संरक्षणमा अग्रणी व्यक्तित्वलाई सम्मान गर्न यस्तो कार्यक्रम महत्वपूर्ण हुने धारणा राखिन् । कार्यक्रममा एम्बेसडर अफ गर्भनर पूजन शाक्य, सिनियर को चिफ एडभाइजर विमला श्रेष्ठ र रिजन चेयर पर्सन मिता कायस्थले पनि बोलेका थिए ।