पोखरा । नेकपा एमालेनिकट अखिल नेपाल महिला संघ (अनेमसंघ) गण्डकी प्रदेशको अध्यक्षमा म्याग्दीकी खरमाया बिटालु सर्वसम्मत चयन भएकी छन् ।

पोखरामा भदौ ५ र ६ गते सम्पन्न संघको दोस्रो प्रदेश सम्मेलनले उनलाई अध्यक्षमा चयन गरेको हो । उनी यसअघि संघको प्रदेश सचिव थिइन् । म्याग्दीको मालिका गाउँपालिकाकी संस्थापक उपाध्यक्षसमेत रहेकी बिटालु नेकपा एमाले गण्डकी प्रदेश कमिटी सदस्य पनि हुन् ।

सम्मेलनले उपाध्यक्षमा पद्मा गुरुङ र कमला मरासिनी, सचिवमा रमा त्रिपाठी, सहसचिवमा निर्मला वाग्ले तथा कोषाध्यक्षमा कृष्णमाया गुरुङलाई चयन गरेको छ ।

नवनिर्वाचित अध्यक्ष बिटालुले आफूलाई सर्वसम्मत चयन गर्न सहयोग गर्ने सबैलाई धन्यवाद दिँदै संगठन र पार्टीलाई थप बलियो बनाउन सक्रिय रहने प्रतिबद्धता जनाइन् ।