तनहुँ ।

तनहुँको देवघाट गाउँपालिका–५ स्थित त्रिशूली नदीमा पौडी खेल्ने क्रममा सोमबार साँझ एक किशोर बेपत्ता भएका छन् । उनीसँगै नदीमा पसेका अर्का एक बालकको भने सकुशल उद्धार गरिएको छ ।

जिल्ला प्रहरी कार्यालय तनहुँका अनुसार भरतपुर महानगरपालिका–१६ मंगलपुरका १७ वर्षीय कृष्ण लामिछाने नदीमा बगेर बेपत्ता भएका हुन् । उनको साथमा रहेका भरतपुर–१५ फूलबारीका १३ वर्षीय कुशल ढकाललाई भने उद्धार गरिएको छ ।

प्रहरी नायब उपरीक्षक अशोक थापाले स्थानीय सोमबहादुर बोटेले बालक ढकाललाई नदीबाट सकुशल उद्धार गरेको जानकारी दिए ।

बेपत्ता लामिछानेको खोजी कार्य तीव्र पारिएको छ । थापाका अनुसार नेपाल प्रहरी र सशस्त्र प्रहरीको टोली खोजीमा खटिएको छ । ‘इलाका प्रहरी कार्यालय देवघाट, प्रहरी चौकी जुगेडी र १७ नम्बर गण आँपटारी चितवनबाट गोताखोरसहितको सशस्त्र प्रहरी टोलीले बेपत्ता बालकको खोजतलास गरिरहेको छ, तर फेला पार्न सकिएको छैन,’ उनले भने ।

---