दमौली।

तनहुँको शुक्लागण्डकी नगरपालिका–५ बेलचौतारामा रहेको जिपी कोइराला श्वासप्रश्वास उपचार केन्द्रमा विद्युतीय चिकित्सा प्रणाली (इएमआर) सेवा सुरु भएको छ । स्वास्थ्य तथा जनसंख्यामन्त्री प्रदीप पौडेलले सोमबार एक कार्यक्रमबीच उक्त सेवाको शुभारम्भ गरे ।

विश्व स्वास्थ्य संगठनको २५ लाख २६ हजार रुपैयाँ बराबरको आर्थिक तथा प्राविधिक सहयोगमा अस्पतालमा उपकरण जडान गरी सेवा सुरु गरिएको हो ।

सरकारले पूर्वप्रधानमन्त्री गिरिजाप्रसाद कोइरालाको नाममा स्थापना गरेको यस केन्द्रलाई दक्षिण एसियाकै उत्कृष्ट श्वासप्रश्वास उपचार केन्द्र बनाउने लक्ष्य लिएको छ । यसका लागि शुक्लागण्डकी नगरपालिकाको बेलचौतारामा अस्पताललाई ७४० रोपनी जग्गा उपलब्ध गराइएको छ ।