पोखरा ।
पोखराको बाटुलेचौरमा तीज मेलाको पहिलो दिन आयोजित विद्यालयस्तरीय लोकनृत्य प्रतियोगितामा सूर्योदय बोर्डिङ स्कुलले प्रथम स्थान हासिल गरेको छ । तीज मेला व्यवस्थापन समितिका अनुसार १० विद्यालयले सहभागिता जनाएको उक्त प्रतियोगितामा सरस्वती आदर्श विद्याश्रम द्वितीय, प्रगति स्कुल तृतीय र विन्ध्यवासिनी माविले सान्त्वना स्थान प्राप्त गरे । प्रतियोगिताका संयोजक रामबहादुर बानियाँले विजेताहरूको घोषणा गरेका थिए ।

त्यसअघि, पोखरा महानगरपालिकाकी उपमेयर मञ्जु कुमारी गुरुङले एक समारोहका बीच मेलाको उद्घाटन गरिन् । उनले बाटुलेचौर क्षेत्र कला, साहित्य र संस्कृतिको उद्गमस्थल भएको उल्लेख गर्दै यसको संरक्षणमा सबैको हातेमालो आवश्यक रहेको बताइन् । पोखरा वडा नम्बर १६ को समन्वय तथा तीज मेला व्यवस्थापन समितिको आयोजनामा स्थानीय बाटुलेचौर खेल मैदानमा मेला सुरु भएको हो ।

मेला उद्घाटनअघि बिहान महेन्द्र गुफादेखि खेल मैदानसम्म २५ वर्षमाथिका महिलाको दौड प्रतियोगिता सम्पन्न भएको थियो । ४० जना महिला सहभागी उक्त दौडमा विष्णु खनाल ५ मिनेट ३ सेकेन्डमा दुरी पूरा गर्दै प्रथम भइन् । त्यसैगरी, सम्झना गुरुङले द्वितीय र सविना बास्तोलाले तृतीय स्थान हासिल गरिन् । दौडमा सहभागी ७५ वर्षीया दुर्गा केसी थापालाई विशेष प्रोत्साहन सम्मान प्रदान गरिएको थियो । कार्यक्रम संयोजक उदिमबहादुर गुरुङका अनुसार बबिता गुरुङ, लक्ष्मी गुरुङ र चोखोमाया गुरुङ पनि उत्कृष्ट घोषित भए ।

तीज मेला व्यवस्थापन समितिकी संयोजक राजकुमारी बानियाँको अध्यक्षतामा भएको उद्घाटन समारोहमा विभिन्न वक्ताले मेलाको ऐतिहासिक महत्वमाथि प्रकाश पारेका थिए । पोखरा १७ की वडाध्यक्ष राधिका शाही योगी, हिमालय क्लब महिला उपसमिति संयोजक इन्दु भट्टराई, अन्नपूर्ण मावि विद्यालय व्यवस्थापन समितिका अध्यक्ष यमनकाजी गुरुङ, विन्ध्यवासिनी माविका अध्यक्ष सन्दीप थापा र कार्यक्रम संयोजक रामबहादुर बानियाँले यसको संरक्षणमा सबै जुट्नुपर्नेमा जोड दिए ।

कार्यक्रममा गायक रामजी पौडेल, कृष्ण सुवेदी, सन्ध्या बिसी र गणेश ढकालले गीत प्रस्तुत गर्दा दर्शक नाचेका थिए भने डान्सर सुरुचि विकले तीज गीतमा नृत्य प्रस्तुत गरेकी थिइन् । कार्यक्रमको सञ्चालन समिति सदस्य भीम गायकले गरेका थिए ।

दौडको उद्घाटन साविक अर्मला गाविसका अध्यक्ष कुलप्रसाद भट्टराईले गरेका थिए । प्रचारप्रसार संयोजक मोहन थापाका अनुसार दौड सुरु हुनुअघि महेन्द्र गुफादेखि मैदानसम्म सडकपेटी र घरघरमा फूलको घडा राखेर स्वागत गरिएको थियो ।