काठमाडौं ।

तोकिएको समयमा स्वास्थ्य बिमा नवीकरण नगर्ने बीमितहरूले अबदेखि जरिवाना तिर्नुपर्ने भएको छ । स्वास्थ्य बिमा बोर्डले एक सूचना जारी गर्दै म्याद गुजारेर नवीकरण गर्नेलाई योगदान रकमको चार गुणासम्म थप शुल्क लाग्ने नयाँ व्यवस्था गरेको हो ।

तर, विगतमा नवीकरण छुटाएकाहरूका लागि आगामी असोज मसान्तसम्म जरिवाना नलाग्ने गरी एक पटकलाई छुट दिइएको छ ।

बोर्डले एक सूचना जारी गर्दै विगतमा नवीकरण छुटाएका सबै बीमित परिवारलाई आगामी असोज मसान्तभित्र नवीकरण गर्न आग्रह गरेको छ । उक्त अवधिसम्म नवीकरण गर्दा कुनै पनि थप शुल्क लाग्ने छैन । बोर्डले दर्ता सहयोगीमार्फत वा अनलाइन प्रणालीबाट सहजै नवीकरण गर्न सकिने जनाएको छ ।

असोज मसान्तपछि भने म्याद गुजारेर नवीकरण गर्नेलाई समयावधिअनुसार जरिवाना लाग्ने बोर्डले स्पष्ट पारेको छ ।

सूचनाअनुसार, म्याद सकिएको तीन महिनाभित्र नवीकरण गरेमा योगदान रकमको १० प्रतिशत थप शुल्क लाग्नेछ । छ महिनाभित्र नवीकरण गर्दा ३० प्रतिशत र एक वर्षभित्र गर्दा ५० प्रतिशत थप शुल्क तिर्नुपर्नेछ ।

त्यसैगरी, एक वर्षभन्दा बढी समय गुजारेमा शतप्रतिशत (एक गुणा), दुई वर्षभन्दा बढी भएमा तीन गुणा र तीन वर्षभन्दा बढी भएमा योगदान रकमको चार गुणा बराबर थप शुल्क लाग्ने व्यवस्था गरिएको बोर्डले जनाएको छ ।