पोखरा ।

गण्डकी प्रदेशमा राजमार्ग सुरक्षा, ट्राफिक व्यवस्थापन तथा सवारी दुर्घटना न्यूनीकरणका उपाय खोज्न पोखरामा एक अन्तर्क्रिया कार्यक्रम सम्पन्न भएको छ । बिहीबार आयोजित कार्यक्रममा सरोकारवालाहरूले हाल देखिएका चुनौती र समाधानका उपायबारे छलफल गरेका छन् ।

राजमार्ग सुरक्षा तथा ट्राफिक व्यवस्थापन कार्यालय, गगनगौंडा र जिल्ला ट्राफिक प्रहरी कार्यालय, कास्कीले नेपाल पर्यटन बोर्ड पोखरासँगको सहकार्यमा कार्यक्रम आयोजना गरेका हुन् । ‘सुरक्षित सडक र सवारी, हामी सबैको जिम्मेवारी’ भन्ने मूल नाराका साथ आयोजित कार्यक्रमको मुख्य उद्देश्य ट्राफिक व्यवस्थापनमा देखिएका चुनौती पहिचान गरी समाधानका लागि नयाँ कार्यदिशा तय गर्नु रहेको थियो ।

कार्यक्रममा जिल्ला ट्राफिक प्रहरी कार्यालय, कास्कीकी प्रमुख प्रहरी निरीक्षक शोभा पाण्डेले कास्की जिल्लाको सवारी दुर्घटनाको अवस्था र ट्राफिक व्यवस्थापनबारे प्रस्तुति दिएकी थिइन् ।

सहभागीहरूले राखेका जिज्ञासाहरूलाई राजमार्ग सुरक्षा तथा ट्राफिक व्यवस्थापन कार्यालयका प्रमुख प्रहरी उपरीक्षक दानबहादुर थापा, सडक विभाग र पोखरा महानगरपालिकाका प्रतिनिधिहरूले सम्बोधन गरेका थिए ।

अन्तर्क्रियामा गण्डकी प्रदेशस्तरीय यातायात व्यवसायी, सरोकारवाला संघ-संस्था, सडक विभाग, पोखरा महानगरपालिका, नागरिक समाज र पत्रकारहरूको उपस्थिति रहेको थियो