पोखरा
पोखरा महानगरपालिकाले भू–उपयोग ऐन २०७९ र भू–उपयोग नियमावली २०७९ बमोजिम भू–उपयोग वर्गीकरणको प्रक्रिया सुरु गरेको छ । महानगरपालिकाले वडा नम्बर ११, १२, १३ देखि ३३ सम्मको विस्तृत जग्गाको भू–उपयोग क्षेत्र वर्गीकरणका लागि सूचना प्रकाशन गरेको हो ।

पोखरा महानगरपालिका भू–उपयोग परिषदको भदौ ५ गते बसेको बैठक र २०७९ असोज १९ गतेको निर्णयानुसार यो प्रक्रिया अगाडि बढेको हो । सूचना प्रकाशित भएको मितिले १५ दिनभित्र सम्बन्धित वडा कार्यालयमार्फत निवेदन दिनुपर्नेछ । निवेदनसँगै जग्गाधनी दर्ता प्रमाणपुर्जाको प्रतिलिपि, जग्गाधनीको कित्ता नम्बर देखिने गरीको नक्सा र जग्गाधनीको सम्पर्क नम्बर पनि बुझाउनुपर्नेछ ।

महानगरपालिकाले भू–उपयोग वर्गीकरणसम्बन्धी विस्तृत विवरण र नक्सा पोखरामुन डट जिओभी डट एनपी र जाग्गाभागिकरणमा उपलब्ध गराएको छ । इच्छुक जग्गाधनीहरूले यी वेबसाइटहरूबाट थप जानकारी लिन सक्नेछन् वा सम्बन्धित वडा कार्यालयमा सम्पर्क गर्न सक्नेछन् । प्रकाशित सूचनाअनुसार कृषि क्षेत्रमा वर्गीकरण गरिएका कित्ताहरूमा कुनै गुनासो भए वा वर्गीकरण क्षेत्र परिवर्तन गर्नुपर्ने भएमा तोकिएको मापदण्डका आधारमा निवेदन दिन सकिनेछ ।