पोखरा ।

नेपाली चलचित्र क्षेत्रकी वरिष्ठ अभिनेत्री तथा कलाकार गौरी मल्ललाई ‘मेनकाजी गुरुङ स्मृति हिमाली स्रष्टा सम्मान २०८२’ बाट सम्मान गरिएको छ ।

हिमाली सांस्कृतिक परिवारको २८औं वार्षिक साधारण सभा तथा १२औं अधिवेशनको उद्घाटन समारोहमा कलाकार मल्ललाई १ लाख ११ हजार १ सय ११ नगद पुरस्कार सहित दोशल्ला र सम्मानपत्र प्रदान गरिएको हो ।

परिवारका पूर्व अध्यक्ष नृत्य निर्देशक मेनकाजी गुरुङको स्मृतिमा परिवारले स्थापना गरेको सो पुरस्कार हरेक २ वर्षमा प्रदान गरिने परिवारका अध्यक्ष ज्ञानबहादुर थापाले जानकारी दिए ।

परिवारका उपाध्यक्ष श्रीजंग गुरुङले लोकनृत्यको विधामा अब्बल मेनकाजीले लोक संस्कृति, शिक्षा र सामाजिक क्षेत्रका गुरुङको योगदानलाई जीवन्त बनाउन कोष स्थापना गरेको जनाए । उनले कोषबाट हिमाली स्रष्टा सम्मानका अलवा लोक संस्कृति सम्बन्धी प्रतियोगिता गर्ने योजना सुनाए ।

परिवारका मानार्थ सदस्य खेमबहादुर गुरुङ संयोजक र क्षेत्रबहादुर गुरुङ र टीकाबहादुर कार्की सदस्य रहेको प्रतिभा छनोट समितिले कलाकार मल्ललाई सिफारिस गरेको थियो ।

कार्यक्रममा परिवारले उत्कृष्ट कलाकार प्रोत्साहन पुरस्कारबाट संगिता आले र युवराज गुरुङलाई जनही नगद १५ हजार सहित सम्मान गरिएको छ । अधिवेशनले सर्वसम्मत रुपमा ज्ञानबहादुर थापाको अध्यक्षतामा १९ सदस्यीय नयाँ कार्यसमिति चयन गरेको छ ।

परिवारको वरिष्ठ उपाध्यक्ष गजबहादुर गुरुङ, उपाध्यक्ष श्रीजङ गुरुङ, महिला उपाध्यक्ष मनसुवा नेपाली, सचिव डबिन गुरुङ, कोषाध्यक्ष महादेव न्यौपाने, सह–सचिव युवराज गुरुङ र सह–कोषाध्यक्ष सबिन गुरुङ निर्विरोध भएका छन् ।

यस्तै, टोपबहादुर खत्री (तेज केसी), संगीता आले, ईश्वरी राना (गुरुङ), वसन्त थापा, दिलु गुरुङ, नितु गुरुङ (ख), हेमाकुमारी परियार, बिग्नेश थापा, सजिना गुरुङ, नितु गुरुङ (क) र सुजन थापामगर कार्यसमिति सदस्यमा चुनिएका छन् ।

प्रतिनिधि सभाका सदस्य मनबहादुर गुरुङले अधिवेशनको उद्घाटन गरे । अधिवेशनले मानार्थ सदस्य खेमबहादुर गुरुङ संयोजकत्व, मानार्थ सदस्यहरु टीकाबहादुर कार्की र रुद्रकुमारी गुरुङ ( मैना ) मानार्थ सदस्य रहेको निर्वाचन मण्डलले अधिवेशन सम्पन्न गरेको थियो ।

कार्यक्रममा परिवारमा आवद्ध कलाकारहरूले संकलन गरेको नेपाली मौलिक सांस्कृतिक संगालो ’हिमाली सुस्केरा’ नामक पुस्तकको पनि विमोचन गरिएको छ ।