पोखरा । ट्रेकिङ इक्युपमेन्ट सप एसोसिएसन (टेसा) पोखराको २७ औं वार्षिक साधारणसभा तथा १५ औं अधिवेशनबाट टीकाबहादुर लम्सालको अध्यक्षतामा नयाँ कार्यसमिति सर्वसम्मत निर्वाचित बनेको छ ।

समितिको प्रथम उपाध्यक्षमा महेन्द्रबहादुर जिसी, द्वितीय उपाध्यक्ष टीकाराम लम्साल, सचिव रमेशराज अधिकारी, सहसचिव बुद्धिबहादुर बस्नेत र कोषाध्यक्षमा केशवराज बास्तोला निर्वाचित भए । सदस्यमा योगेश सुवेदी, किरण काफ्ले, हरिमाया ढुंगाना र राजकुमार नेपाली र निवर्तमान अध्यक्षमा प्रमोद भण्डारी छन् ।

सभामा गण्डकी प्रदेशका उद्योग तथा पर्यटन मन्त्री मित्रलाल बस्यालले गण्डकी प्रदेशमा पर्यटनको प्रचूर सम्भावना रहेको बताउँदै यसको उजागरका लागि सबैको प्रयास आवश्यक भएकोमा जोड दिए ।

पोखरा भ्रमण वर्ष २०२५ कार्यसम्पादन समितिका संयोजक गोपिबहादुर भट्टराईले पोखरासहित समग्र गण्डकी प्रदेशको पर्यटकीय विकासका लागि सबैको साझा प्रयास आवश्यक हुनेमा जोड दिए । पोखरा पर्यटन परिषद्का अध्यक्ष तारानाथ पहारीले पर्यटन सम्बद्ध सबै संघ, संस्थासँग सहकार्य गर्दै पर्यटन प्रवद्र्धन विकासका कार्यक्रमअघि बढाइने जनाए ।

टेसा पोखरा अध्यक्ष प्रमोद भण्डारीको अध्यक्षतामा भएको कार्यक्रममा सचिव महेन्द्र जिसी, प्रथम उपाध्यक्ष टीकाबहादुर लम्साल, सहसचिव टीकाराम लम्साल र कोषाध्यक्ष रमेशराज अधिकारीले बोलेका थिए ।