पोखरा । नेपाल कम्युनिष्ट पार्टी (माओवादी केन्द्र)का महासचिव देवप्रसाद गुरुङले अस्थिरता र अराजकता सृजना गर्ने प्रयासका विरुद्ध दलहरू एकताबद्ध हुनुपर्ने बताएका छन् । नेकपा (माओवादी केन्द्र) पोखरा महानगरपालिका १७ ले आयोजना गरेको शुभकामना आदानप्रदान कार्यक्रममा उनले विभिन्न शक्तिले देशमा द्वन्द्व सृजना गरेर संकट निम्त्याउने प्रयास गरेकाले राष्ट्रिय एकता बलियो बनाउनुपर्नेमा जोड दिए ।

‘अहिलेको व्यवस्थालाई कमजोर बनाउने प्रयास भएको छ । दलहरूबीचको मजबुत एकताबाट मात्र राष्ट्रिय स्वाधीनता र एकताका लागि बल पुग्दछ । वर्तमान व्यवस्थाको विकल्प छैन’, महासचिव गुरुङले भने । नेता गुरुङले देश स्वाधीन बन्नका लागि भ्रष्टाचारको अन्त्य हुनैपर्नेमा जोड दिए ।

माओवादीको नेतृत्वमा बनेको अघिल्लो सरकारले सुशासनका लागि काम गरेकाले जनतामा समेत उत्साह छाएको उनको भनाइ छ । महासचिव गुरुङले देश विकासमा माओवादी केन्द्रको विकल्प नभएको जनाए । उनले भने, ‘केही सीमा र कमजोरी भए पनि माओवादीको विकल्प अन्य दल हुन सक्दैनन् । अहिले आकारमा सानो भए पनि व्यवस्थाको रक्षा माओवादीले मात्र गर्न सक्छ ।’

नेता गुरुङले विभिन्न चाडपर्वहरूले देशमा राष्ट्रिय एकता बलियो बनाउने र नेपाली समाजको एकताको आधार बनेको उल्लेख गरे । कार्यक्रममा संविधानसभा सदस्य एवं सो पार्टीका केन्द्रीय सदस्य तेजकुमारी पौडेल, दुर्गा विक, गंगा पोखरेल, अखिल नेपाल महिला संघ कास्की अध्यक्ष सृजना त्रिपाठी लगायतले देश र जनताको पक्षमा निरन्तर खबरदारी गर्नुपर्नेमा जोड दिए ।