पोखरा ।

गण्डकी प्रदेश र लुम्बिनी प्रदेश सरकारबीचको समन्वयात्मक बैठक स्याङ्जाको मालुंगास्थित उत्तरबाहिनीमा सुरु भएको छ । गण्डकी प्रदेश सरकारको आयोजनामा भएको बैठकमा २ प्रदेशको सहकार्यमा गर्न सकिने योजनाहरु र अन्य सम्भाब्यताका बारेमा छलफल तथा निर्णय हुनेछ ।

यसअघि लुम्बिनीको आयोजनामा पाल्पाको रानीमहलमा गत वर्षको माघ ३० गते यस्तै बैठक भएको थियो । बैठकले २१ बुँदे साझा अवधारणा समेत सार्वजनिक गरेको थियो ।

बैठकमा गण्डकीका मुख्यमन्त्री सुरेन्द्रराज पाण्डे, लुम्बिनीका मुख्यमन्त्री चेतनारयण आचार्य, दुवै प्रदेशका मन्त्रीहरु,  प्रदेश सभा सदस्यहरु, स्थानीय तहका जनप्रतिनिधिलगायत सरोकारवालाको सहभागिता छ ।

यसअघिको बैठकमा लुम्बिनी र गण्डकी प्रदेश सरकारबीच संघीय सरकारले अघि सारेको भरतपुर–बुटवल–पोखरा क्षेत्रलाई समेटी गण्डकी आर्थिक त्रिभुज परियोजना कार्यान्वयनको पहलका लागि साझा सहमति भएको थियो ।

संघीय सरकारले गत आर्थिक वर्षको बजेट वक्तव्यमार्फत अघि सारेको गण्डकी आर्थिक त्रिभुज परियोजना कार्यान्वयन गर्ने सहमति गरिएको थियो । सरकारले गत आवको बजेट वक्तव्यमार्फत एकीकृत विकासको अवधारणाअनुसार नमूना विकास अभियान सञ्चालन गर्न भरतपुर–बुटवल–पोखरालाई तीनवटा कोणमा राखी गण्डकी आर्थिक त्रिभुज परियोजना सञ्चालन गरिने घोषणा गरेको थियो । परियोजनालाई सार्वजनिक निजी साझेदारीको नमुना परियोजनाका रुपमा विकास गरी कार्यान्वयन गर्न रु दुई अर्ब विनियोजन गरिएको बजेट वक्तव्यमा घोषणा गरिएको थियो ।

नेपालको संविधानको धारा ५६ अनुसार राज्यशक्तिको बाँडफाँट, सङ्घीय ढाँचाको शासकीय अभ्यास तथा तीन तहका सरकारबीच समन्वय, सहकार्य र सहअस्तित्वको मर्मलाई आत्मसात् गर्दै बैठक गरिएको हो ।