पोखरा । कास्कीको माछापुच्छ्रे गाउँपालिका–८ को वडा कार्यालयको आयोजनामा वडाका गृहिणी महिला बिच उद्यमशीलता सम्बन्धी अन्तरक्रिया गरिएको छ ।
वडा कार्यालयमा आईतबार भएको कार्यक्रममा संविधान सभा सदस्य तथा अचार उद्यमी शान्ता चौधरीले आफ्नो कम्लरी जीवनदेखि व्यवसायी बन्ने संघर्षको अनुभव बाँडेकी थिइन् । महिलामा हिम्मत र आत्मनिर्भरता भए समाजमा अपमान सहनु नपर्ने उनको भनाइ थियो । उनले अचार व्यवसायलाई टिकाउ बनाउन बजार व्यवस्थापनमा सहयोग गर्ने प्रतिवद्धता व्यक्त गरिन् ।
माछापुच्छ्रे गाउँपालिका उपप्रमुख सिता अधिकारीले गृहिणी महिलालाई उद्यमशीलताको माध्यमबाट आत्मनिर्भर बनाउन पालिका प्रतिबद्ध रहेको बताइन् ।स्थानीय उत्पादनलाई प्राथमिकता दिने र संस्थागत रूपमा समर्थन गर्ने उनले आश्वासन दिइन् ।
माछापुच्छ्रे गाउँपालिका-८ का वडाअध्यक्ष राम गुरुङले अचार उद्यमलाई सफल उद्यमका रूपमा अगाडि बढाइने बताए । यसमा वडा कार्यालयबाट सक्दो सहयोग गरिने उनको भनाइ थियो ।
कार्यक्रममा माछापुच्छ्रे-१ का वडासदस्य पुर्खाबहादुर पुनले स्थानीय सरकार र संघ–संस्थाले विभिन्न तालिम दिए पनि बजार व्यवस्थापनमा ध्यान नदिँदा ती प्रयासहरू सफल हुन नसकेको उल्लेख गरे । सोही कारण बजारिकरणमै उद्यमशीलताको सफलता निहित रहेको उनको भनाइ थियो । युवा उद्यमी सबिता बरालले महिलाले गरेको श्रमलाई आय आर्जनसँग जोड्न सके मात्र आत्मनिर्भर समाज निर्माण सम्भव हुने धारणा राखिन् ।
वडाअध्यक्ष राम गुरुङको अध्यक्षतामा भएको कार्यक्रमको सञ्चालन वडा सदस्य अर्जुन परियारले गरेका थिए । भने, कार्यपालिका सदस्य मनकुमारी तामाङले स्वागत मन्तव्य राखेको कार्यक्रममा वडासदस्य चोकप्रसाद दाहालले कार्यक्रमको उद्देश्यबारे जानकारी दिएका थिए ।