पोखरा ।
समाजसेवी विश्वमोहन गौचनले खेलकुद तथा शैक्षिक सामग्री हस्तान्तरण गरेका छन् । उनले आफ्नो ८६ औं जन्मदिनको सन्दर्भमा अन्नपूर्ण गाउँपालिका ६ लुम्लेमा रहेको संगम माध्यमिक विद्यालयलाई ती सामग्री हस्तान्तरण गरेका हुन् ।

समाजसेवी गौचनले आफ्नो जन्मदिनमा हरेक वर्ष शिक्षा, स्वास्थ्य, वातावरण र समाजसेवाका क्षेत्रमा सेवामूलक गतिविधि गर्दै आएका छन् । अघिल्लो वर्ष आफैंले अध्यापन गरेको पाउँदुर आधारभूत विद्यालयलाई सहयोग गरेकोमा यो पटक संगम माविमा आएको उनको भनाइ छ ।

वडा ६ लुम्लेका वडाध्यक्ष एकदेव देवकोटाले गौचनले सामाजिक तथा शैक्षिक क्षेत्रमा पुर्‍याएका विविध आयामबारे चर्चा गर्दै सुस्वास्थ्य र दीर्घ जीवनको कामना गरे । सामग्री ग्रहण गर्दै विद्यालय व्यवस्थापन समितिका अध्यक्ष चित्रबहादुर गुरुङले गौचनप्रति आभार व्यक्त गरे ।

लुम्ले कविता गाउँका अध्यक्ष भरत देवकोटाले विश्वमोहन गौचनलाई नाम एक पहिचान अनेक भएका प्रतिभाका रूपमा चिनाए । प्रधानाध्यापक रीता खनालले कविता गाउँ लुम्लेका संरक्षकबाट प्राप्त सहयोगले विद्यालयका विपन्न तथा जेहेन्दार विद्यार्थीलाई विद्यार्थीलाई सहयोग पुग्ने जनाइन् । विद्यालयका सहायक प्रधानाध्यापक टंकप्रसाद देवकोटाले गौचनको जीवनयात्रा पछिल्लो पुस्ताका लागि प्रेरणादायी बनेको धारणा राखे ।