पोखरा ।
स्थापना भएको २८ वर्षपछि पोखरा विश्वविद्यालयले काठमाडौं उपत्यकामा आंगिक क्याम्पस खोलेको छ । ललितपुर ९ च्यासलस्थित श्रमिक शान्ति क्याम्पसलाई विश्वविद्यालयले आंगिक क्याम्पसमा रूपान्तरण गरी सञ्चालन गर्न लागेको हो ।

यसअघि पोखरा उपत्यकाबाहिर आंगिक महाविद्यालय विस्तार गर्ने प्रयास भए पनि सफल हुन नसकेकोमा हालै बसेको विश्वविद्यालय कार्यकारी परिषद्को बैठकले श्रमिक शान्ति क्याम्पसलाई आंगिक क्याम्पसका रूपमा सञ्चालन गर्ने निर्णय गरेको थियो । श्रमिक शान्ति क्याम्पस सञ्चालक समितिको बैठक, क्याम्पस सभाको बैठक तथा पोखरा विश्वविद्यालय कार्यकारी परिषद्को निर्णयका आधारमा यो निर्णय गरिएको हो ।

यसबारे साउन २७ गते भएको समझदारीपत्रमा त्रिभुवन विश्वविद्यालयका उपकुलपति प्राडा दीपक अर्याल र पोखरा विश्वविद्यालयका रजिस्ट्रार सहप्राडा अजय थापा तथा श्रमिक शान्ति क्याम्पसका सञ्चालक समितिका अध्यक्ष हरिकृष्ण व्यञ्जनकार र क्याम्पस प्रमुख रोशन मैनालीले हस्ताक्षर गरेका छन् । त्रिभुवन विश्वविद्यालयवाट सम्बन्धन लिई कार्यक्रम सञ्चालन गर्दै आएको सामुदायिक क्याम्पस श्रमिक शान्ति क्याम्पस अब पोखरा विश्वविद्यालयको आंगिक क्याम्पस बनेको छ ।

२०६४ मा स्थापना भएको श्रमिक शान्ति क्याम्पसमा यसै शैक्षिक सत्रदेखि मानविकी तथा सामाजिक शास्त्र संकायतर्फ बिएएलएलबी, बिसिएसआइटी, ब्याचलर आफ एआई जस्ता कार्यक्रम सञ्चालन हुने छन् । अब पोखरा विश्वविद्यालय अन्तर्गत आंगिक महाविद्यालयको संख्या ५ पुगेको छ ।

यसअघि २०५६ मा स्कुल अफ बिजनेस, २०५७ मा स्कुल अफ हेल्थ एन्ड एलाइड साइन्सेज, २०६० मा स्कुल अफ डेभलपमेन्ट एन्ड सोसल इन्जिनियरिङ र २०६६ मा स्कूल अफ इन्जिनियरिङ आंगिक क्याम्पसका रुपमा स्थापना भएका थिए । हाल यी ४ आंगिक स्कुलमा ४२ कार्यक्रम सञ्चालनमा छन् । त्यहाँ ३४ सयभन्दा बढी विद्यार्थी छन् ।