पोखरा ।
नेपाल परिवार नियोजन संघ कास्की शाखाले मंगलबारदेखि किशोर किशोरीलाई लक्षित गरी यौन तथा प्रजनन स्वास्थ्य सचेतना अभियान थालेको छ । पोखरा महानगरपालिका वडा नं. २५ को सहयोग तथा समन्वयमा हेमजा स्थित गौरीशंकर माध्यामिक विद्यालयबाट अभिायन सुरु गरिएको हो ।

कास्कीका ४ गाउँपालिका २/२ विद्यालय तथा कलेज गरी ८ र महानगरका १६ गरी २४ विद्यालय तथा कलेजमा यो अभिायन सञ्चालन गरिने नेपाल परिवार नियोजन संघ कास्की सभापति नवीन सिग्देलले जानकारी दिए ।

‘यो अभियान स्थानीय सरकार तथा स्वास्थ्यसँग सम्बन्धित संस्थाहरुसँग मिलेर गर्ने लक्ष्य लिएका छौं,’ सिग्देलले भने । अभियान पोखरा महानगरका प्रवक्ता तथा वडा नं. २५ का वडाध्यक्ष मोतिलाल तिम्सिनाले सुरुआत गरे । उनले यौन तथा प्रजनन् स्वास्थ्यका बारेमा किशोरकिशोरीले खुलेर जानकारी लिने थलो यो अभियान हुने अपेक्षा गरे ।

पोखरा महानगरपालिका स्वास्थ्य महाशाखाका प्रमुख भरतराज पौडेलले चासो र जिज्ञासा भएमा स्रोत अभाव नहुने बताउँदै अभियानमा स्वास्थ्य महाशाखा हातेमालो गरेर जाने उल्लेख गरे । प्रदेश जनस्वास्थ्य कार्यालय कास्की प्रमुख रामबहादुर नेपालीले यौन तथा प्रजनन् स्वास्थ्यका विषयमा खुलेर कुरा राख्न नसक्दा कतिपय किशोरकिशोरी मानसिक रोगको शिकार हुने गरेको बताउँदै यस्ता खालका अभियान जरुरी भएको जनाए ।

कार्यक्रममा नेपाल परिवार नियोजन संघ कास्की शाखाका कोषाध्यक्ष विष्णुप्रसाद दाहाल ‘आभाष’ र वरिष्ठ शाखा प्रबन्धक नवराज तिवारीले सहजीकरण गरेका थिए । कार्यक्रममा नेपाली कांग्रेस पोखरा २५ सभापति मधुसुदन त्रिपाठी र गौरीशंकर माविका सहायक प्रधानाध्यापक मानबहादुर कार्कीले बोलेका थिए ।