काठमाडौैं । नेपाल कम्युनिष्ट पार्टी (एमाले) का अध्यक्ष तथा प्रधानमन्त्री केपी शर्मा ओलीले सुशासन, विकास, स्थायित्व, राष्ट्रिय अखण्डता र स्वाधीनताका पक्षमा उभिएकाले पार्टीप्रति आमजनताको विश्वास बढेको बताएका छन् ।

ललितपुरको गोदावरीस्थित सनराइज सम्मेलन केन्द्रमा आजदेखि सुरु भएको पार्टीको दोस्रो विधान महाधिवेशनको उद्घाटन सत्रमा सम्बोधन गर्दै अध्यक्ष ओलीले देश र जनताको हितमा उभिँदा पार्टीप्रति जनताको विश्वास मजबुत भएको उल्लेख गरेका छन् ।

अध्यक्ष ओलीले भने, ‘नेपाली जनताले अप्ठ्यारो परिस्थितिमासमेत साथ दिएका छन्, नेपाल राष्ट्र र नेपाली जनताको समृद्धिप्रति सदैव प्रतिबद्ध छौँ, भएन भन्न सजिलो छ, लामो बलिदानीमार्फत यहाँसम्म आइपुगेका छौँ, हामी उज्ज्वल भविष्यका लागि मिसन ८४ को अभियानमा छौँ ।’

उनले एमाले पार्टी र त्यसका नेताहरूमाथि भइरहेका गालीगलौजले जनविश्वासमा असर नपारेको समेत बताएका छन् र थपे, ‘अहिले सरकारमा छौँ, जनताकाबीच पुगेर अझ विश्वास जित्न सक्यौँ भने ८४ सालमा हुने निर्वाचनमा बहुमत प्राप्त गर्नबाट एमालेलाई कसैले रोक्न सक्दैन । जनताकामाझ गई सक्रिय भएर काम गरौँ ।’

अध्यक्ष ओलीले सामाजिक न्याय र समानताका लागि पार्टीको प्रतिबद्धतामा जोड दिँदै भने, ‘हामी अभियानकर्मी हौँ, समाजमा परिवर्तन भएको छ, सामाजिक न्याय, समानता र विकासको अवस्था हिजोको जस्तो छैन, हाम्रो लक्ष्य समाजवादतर्फ हो, अपेक्षा गरिएजस्तो विकास भएको छैन होला, त्यसैले त परिवर्तनकारी हस्तक्षेप गर्दै हिँडेका छौँ, देशमा परिवर्तन ल्याउनका लागि हिँडेका हौँ ।’

उनले पार्टीलाई सुदृढ, सशक्त र लोकप्रिय बनाउनेमा महिला कार्यकर्ताको भूमिका विशेष रहेको समेत बताए र जोड दिए, ‘हामी निर्णायक राष्ट्रिय शक्तिका रुपमा पुगेका छौँ, हाम्रो नीतिहरू नै राष्ट्रिय नीति हुन्, आज नेता तथा आमकार्यकर्ताले नेतृत्वप्रति विश्वास गरेका छन् । सबै मिलौँ, पार्टीलाई अझ सुदृढ बनाऔँ ।’

अध्यक्ष ओलीले पार्टीप्रति आमजनता र कार्यकर्ताले देखाएको विश्वासका कारण आन्दोलन हाँक्ने शक्ति प्राप्त भएको उल्लेख गर्दै पार्टीका नेता तथा कार्यकर्ताको सजगताप्रति ढुक्क रहेको बताए ।

उहाँले आफ्नो सम्बोधनमा पार्टीको वर्तमान भूमिका, नीतिगत प्राथमिकता र समाज परिवर्तनका लक्ष्यको बारेमा पनि लामो व्याख्या दिएका छन्। उनले भने, ‘हामी केवल सत्ता हासिल गर्ने दल होइनौं, हामी जनताको जीवनस्तर सुधार्न, सामाजिक न्याय र समानता स्थापित गर्न, र समाजवादतर्फ अघि बढाउन प्रतिबद्ध छौँ । हाम्रो पार्टीले अहिलेसम्म गरेका काम र आगामी कार्यक्रमहरूले देशको समृद्धि र जनताको विश्वास सुनिश्चित गर्नेछ ।’

अध्यक्ष ओलीले पार्टीका महिला, युवा र विभिन्न सामाजिक समूहका सदस्यलाई सशक्तिकरणको महत्त्वमा जोड दिँदै भने, ‘महिला कार्यकर्ताले पार्टीलाई जोगाउने, सुदृढ बनाउने र सामाजिक अभियानमा सक्रिय भूमिका खेल्ने अवसर पाएका छन्। युवा कार्यकर्ताले आफ्नो उर्जा र योगदानबाट पार्टीको लोकप्रियता बढाउनेछन्। सबै मिलेर पार्टीलाई अझ सबल, सशक्त र जिम्मेवार बनाऔँ ।’

उनले पार्टीभित्र अनुशासन, संगठनात्मक मजबुती र नेतृत्वमा विश्वास कायम राख्नुपर्नेमा जोड दिँदै भने, ‘हामी नेता र कार्यकर्तासँग मिलेर पार्टीलाई थप सुदृढ बनाउँदै अघि बढिरहेका छौँ। संगठन बलियो हुँदा मात्र राष्ट्र बलियो हुन्छ। पार्टीको बल, सदस्यको सक्रियता र जनताको विश्वास सधैं एकअर्कासँग जोडिएको छ।’

अध्यक्ष ओलीले आफ्नो सम्बोधनको अन्त्यमा भने, ‘हामीले हासिल गरेका उपलब्धि र अनुभवलाई भविष्यका चुनौती सामना गर्न प्रयोग गर्नेछौँ। पार्टी र देशका लागि सबै नेता र कार्यकर्ताले एकजुट भएर काम गर्नु आवश्यक छ। यसरी मात्र आगामी निर्वाचनमा बहुमत प्राप्त गर्न र राष्ट्रिय शक्ति बलियो बनाउन सकिन्छ।’

---