पोखरा । ऊर्जा वातावरण निर्माण तथा इन्जिनियरिङ प्रालिले पोखराको सिमलचौर (राष्ट्र बैंक मार्ग)मा आधा मेगावाट लोड क्षमताको सुपर–फास्ट हब विद्युतीय सवारी साधन (इभी) को चार्जिङ स्टेसन स्थापना गरेको छ ।

दिगो ऊर्जा च्यालेन्ज फन्डबाट आर्थिक तथा प्राविधिक सहयोग प्राप्त परियोजना अन्तर्गत ४ सय किलोवाट क्षमताको अत्याधुनिक चार्जिङ स्टेसनले एकै पटकमा १० वटा विद्युतीय सवारी साधन चार्ज गर्न सक्ने प्रालिकी अध्यक्ष इन्दिरा शर्मा भण्डारीले जानकारी दिइन् । गण्डकी प्रदेशका ऊर्जा, जलस्रोत तथा खानेपानी मन्त्री फणीन्द्र देवकोटाले शनिबार सो स्टेशनको उद्घाटन गरे ।

प्रालिका अध्यक्ष भण्डारीका अनुसार नेपाल वैकल्पिक ऊर्जा प्रवद्र्धन केन्द्रको ५० प्रतिशत अनुदानमा २ करोड ४ लाखको लागतमा स्टेशन स्थापना भएको हो । बढीमा १५ रुपैयाँ प्रति युनिट (भ्याट सहित) चार्जको व्यवस्था गरिएको छ । गाडी चार्ज प्रालिसँगको साझेदारीमा गाडी चार्ज फ्रेन्चाइज मोडल अन्तर्गत स्थापना गरिएको हो ।

यसमा हुवावे कम्पनीको स्वामित्वयुक्त तरल पदार्थद्वारा चिसो पारिएको हब प्रविधि प्रयोग गरिएको अध्यक्ष भण्डारीले जनाइन् । मन्त्री देवकोटाले वातावरण सन्तुलन कायम गर्न विद्युतीय सवारी प्रवद्र्धन गर्नुपर्नेमा जोड दिए । उनले ऊर्जाको क्षेत्रमा काम गर्न गण्डकी प्रदेशले विद्युत विकास विधेयक पास गरेको जानकारी दिए । संघीय सरकारले विद्युतीय सवारीको प्रवद्र्धनका लागि इभी चार्जिङ स्टेसनको गुरुयोजना निर्माण गरेको उल्लेख गर्दै उनले ४ सय २५ चार्जिङ स्टेशन निर्माण गर्न लागेको बताए ।

उनले प्रत्येक ३० किमीमा चार्जिङ स्टेसन स्थापना गर्नुपर्ने उल्लेख गरे । उनले निजी–सार्वजनिक अवधारणामा चार्जिङ स्टेसन स्थापना गर्नु पर्नेमा जोड दिए । चार्जिङ स्टेसनको गुणस्तरमा प्रश्न उठेको चर्चा गर्दै उनले गुणस्तर र दिगोपनमा ध्यान दिन कम्पनीलाई आग्रह गरे ।

नेपाल विद्युत प्राधिकरणका उपकार्यकारी निर्देशक रामजी भण्डारीले हरित ऊर्जा र वातावरणमैत्री सहर निर्माण गर्ने क्रममा अहिलेसम्मकै सबैभन्दा ठूलो र आधुनिक इभी चार्जिङ स्टेसन स्थापना गरेको दाबी गरे । ५ वटा चार्जर रहेको स्टेसनले एकैचोटिमा एउटा गाडीलाई १ सय ८० किलोवाटसम्म ऊर्जा आपूर्ति गर्न सक्ने उनले उल्लेख गरे । उनले स्टेसन प्राविधिक हिसाबले सुरक्षित र भरपर्दो रहेको बताए ।

हुवावे कम्पनी नेपाल प्रमुख मिस्टर जिमले कम्पनीको प्राविधिक सहयोग रहेको चार्जिङ स्टेसन आधुनिक रहेको बताए । उनले स्टेसनबाट चिया कफी खाने समयमा सवारी चार्जिङ हुने जानकारी दिए । वैकल्पिक ऊर्जा प्रवद्र्धन केन्द्रका प्रतिनिधि प्रकाश भण्डारीले केन्द्रले १ सय २४ इभी गाडीको चार्जिङ स्टेशन निर्माणमा सहयोग गरेको बताए ।

गाडीचार्जका सहसंस्थापक तथा प्रमुख कार्यकारी निर्देशक प्रेशा श्रेष्ठले गाडी चार्जको राष्ट्रव्यापी योजना अन्तर्गत पोखरामा स्टेसन खोलेको जानकारी दिइन् । ‘गरौँ राष्ट्रलाई रिचार्ज’ भन्ने नाराका साथ पूर्वमा पथरीदेखि पश्चिममा धनगढीसम्म १ सय ५ भन्दा बढी इभी चार्जिङ स्टेसन स्थापना गर्ने लक्ष्य रहेको जानकारी दिँदै उनले देशव्यापी रूपमा चार्जिङ स्टेसनमार्फत समुदायमा पहुँचयोग्य र भरपर्दो इभी पूर्वाधार विस्तार गर्दै दिगो गतिशीलता प्रवद्र्धन गर्ने बताइन् ।