पोखरा ।

गोरखा मिलन समाज पोखराले आफ्नो स्थापना दिवसको अवसरमा चित्रकला तथा वक्तृत्वकला प्रतियोगिता गरेको छ । गोरखाबाट पोखरा आएर अध्ययन गर्ने विद्यार्थीबीच समाजको २७ औं वार्षिकोत्सवको अवसरमा विन्ध्यश्वरी आदर्श बोर्डिङ स्कुलमा उक्त प्रतियोगिता सम्पन्न भएको हो ।

चित्रकला प्रतियोगितामा जुनियरतर्फ सुमिना सिंखडा प्रथम, लुयना गुरुङ द्वितीय, सुजिता बयलकाटी तृतीय र नमिक भुजेल, यार्जा राना मगर र लुना गुरुङ सान्त्वना भएका छन् । चित्रकला सिनियरतर्फ विवेक गिरी प्रथम, प्रिशा गौतम द्वितीय र कृतन घले तृतीय भएका छन् ।

वक्तृत्वकलाका लागि ‘गोरखा हाम्रो गौरव’ शीर्षक दिइएको थियो । उक्त शीर्षकको आधारमा भएको प्रतिस्पर्धामा सन्जु सुर्खेती प्रथम, प्रवेश थापा द्वितीय र रोशन कार्की तृतीय भएका छन् ।

कार्यक्रममा प्रमुख अतिथि उर्जा, जलस्रोत तथा खानेपानी मन्त्री फणिन्द्र देवकोटाले गोरखाको माटो र गोरखालाई माया गर्नेहरूको समाज भएकाले समाजले गर्ने हरेक कार्यक्रम विशेष हुने बताए । गोरखाबाट पोखरा विभिन्न पेशा, व्यवसाय तथा अध्ययनका लागि आएका व्यक्तिहरूको प्रतिभा देख्दा निकै खुशी लागेको उनले बताए । गोरखाको विषयमा विद्यार्थीहरूले बोल्दा गोरखाको महत्व र यसको गरिमा झन् उच्च बनेको महसुस भएको उल्लेख गर्दै उनले भने, ‘गोरखाबाट हामी पोखरा आए पनि मातृभूमिप्रतिको माया र समर्पण सधैं गाढा रहनेछ ।’

कार्यक्रम संयोजक तथा समाजका पूर्व अध्यक्ष कृष्ण कुमार श्रेष्ठले समाजको २७ औं वार्षिकोत्सवको अवसरमा आयोजित यस प्रकारका कार्यक्रमले विद्यार्थीको प्रतिभा प्रस्फुटनमा ठूलो सहयोग गर्ने बताए । विद्यार्थीहरूले चित्रकलामा समेत गोर्खाली भाव झल्कने चित्र बनाउनुले गोरखा प्रतिको माया र स्मरण बालबालिकामा समेत रहेको देखाएको उनले बताए ।

कार्यक्रम समाजका महासचिव शितल श्रेष्ठले सञ्चालन गरेका थिए भने अध्यक्षता समाजका अध्यक्ष अग्रिम श्रेष्ठले गरेका थिए ।