गोरखा । गोरखाको गण्डकी गाउँपालिकाले आइतबार सार्वजनिक बिदा दिने निर्णय गरेको छ । चेपाङ समुदायको प्रमुख पर्व छोनाम न्वागीको अवसर पारेर पालिकाले यस्तो निर्णय गरेको हो ।

गाउँपालिकाका प्रमुख प्रशासकीय अधिकृत भुवन चापागाईंका अनुसार भदौ ६ गते बसेको कार्यपालिका बैठकले न्वागी पर्वलाई सम्मान गर्दै पालिकाभित्र सार्वजनिक बिदा दिने निर्णय गरेको हो ।

चापागाईंले भने, ‘चेपाङ समुदायले हरेक वर्ष भदौ २२ गते सामूहिक रुपमा छोनाम न्वागी मनाउँदै आएका छन् । नयाँ अन्नबाली भित्र्याएर उपभोग गर्नु अघि प्रकृति देवी–देवता, पितृ र कुललाई चढाउने परम्पराअनुसार यो पर्व मनाइन्छ । त्यसैले पालिकाले यस दिन सार्वजनिक बिदा दिने निर्णय गरेको हो ।’

पालिकाले आज सरकारी कार्यालय, विद्यालय, स्वास्थ्य संस्था र अन्य संघ–संस्थाहरु बन्द हुने जानकारी गराएको छ । यो जानकारी प्रमुख प्रशासकीय अधिकृत चापागाईंको हस्ताक्षरसहितको सूचनामा उल्लेख गरिएको छ ।