पोखरा । मालेपाटन स्थित हिलसाइड स्काउट ट्रुपले मिलन स्काउट क्रुको व्यवस्थापनमा प्रदेश स्काउट कार्यालयमा २ दिवसीय पेट्रोल लिडर प्रशिक्षण शिविर तथा क्याम्प आइतबार सकिएको छ । शिक्षक मीनप्रसाद सुवेदी र शिक्षिका सोनिका कँडेलको समन्वयमा भएको कार्यक्रममा ७० जनाको सहभागिता रह्यो ।

क्याम्पमा प्रशिक्षक अमृत पुन, प्रतीक्षा मल्ल ठकुरी, सोनिका कँडेल, प्रतीक्षा खनाल लगायतकाले विविध सत्र सञ्चालन गरे । सहभागीले स्काउटको इतिहास, ध्येय, नियम र प्रतिज्ञाबारे जानकारी प्राप्त गर्नुका साथै समूहगत नेतृत्व, समय व्यवस्थापन, आपतकालीन अवस्थामा उपयोग हुने सीप, प्राथमिक उपचार, वातावरण संरक्षण, आत्मनिर्भरता र सामाजिक उत्तरदायित्व जस्ता जीवनोपयोगी विषय सिक्ने अवसर पाए ।

स्काउट अभियानले ‘कर्तव्य, अनुशासन र सेवा’लाई मुख्य सन्देशका रूपमा लिएको छ । यस क्याम्पमार्फत विद्यार्थीमा ‘सदा तयार रहनू’ भन्ने मूल मन्त्र आत्मसात् गर्ने वातावरण बनेको छ । सहभागीहरूले व्यावहारिक गतिविधिमार्फत एकअर्कासँग सहयोग गर्ने, कठिनाइमा धैर्य गर्ने र समाजमा सकारात्मक योगदान दिने भावनालाई बलियो बनाएको जनाएका छन् ।
कार्यक्रममा सहभागी विभिन्न सामूहिक अभ्यास, गीत–संगीत, समूह खेल र छलफल जस्ता गतिविधिमा संलग्न भए । कार्यक्रमपछि उनीहरुले यस्ता क्याम्पले विद्यार्थीलाई पुस्तक बाहिरको शिक्षासँगै व्यवहारिक जीवन सिप सिकाउने भएकाले निरन्तर आयोजना गर्नुपर्नेमा जोड दिए । सोही अवसरमा ११ विद्यार्थीलाई दीक्षान्त गरिएको थियो ।