पोखरा । संगम बचत तथा ऋण सहकारी संस्था लिमिटेडले १८ औं वार्षिक साधारण सभा भएको छ । सभामा सामाजिक उत्तरदायित्व अन्तर्गत विद्यार्थीलाई छात्रवृत्ति प्रदान र सम्मान गरियो ।

सभाले विभिन्न प्रतिवेदन पास गरेको थियो । संगमले पोखराको रामबजारको प्रधान कार्यालय र न्युरोडमा सेवा केन्द्रमार्फत सेवा दिइरहेको छ । सभामा ज्येष्ठ सेयर सदस्य दीपा थापाले सहकारीको अझै उन्नति प्रगति हुँदै अगाडि बढोस् भनी कामना गरिन् ।

अध्यक्ष नवराज तिवारीले संस्थालाई मुनाफा केन्द्रितभन्दा पनि सेयर सदस्यहरु तथा आम नागरिकबिच विश्वासयोग्य, प्रविधिमैत्री, छिटोछरितो र गुणस्तरीय सेवा प्रदायक साकोसको रूपमा विकास गर्न लागिएको जनाए । लेखा संयोजक भोविन्द्र गिरीले ऋण लगानीतर्फ सामान्य गिरावट आए पनि बचत संकलन, कुल कारोबार र मुनाफामा वृद्धि भएको जनाए ।

सल्लाहकार संयोजक निरज थापाले विषम परिस्थितिमा पनि गण्डकी प्रदेशकै उत्कृष्ट भएकोमा सबैलाई बधाई दिए । सेयर सदस्य कुमारी गुरुङले संगम सहकारीद्वारा महिलालाई लक्षित गरी आयोजना गरिएका स्वास्थ्य शिविर र क्षमता अभिवृद्धिका कार्यक्रमहरु निकै लाभदायक भएको सुनाए ।

कालिका बहुमुखी क्याम्पस पोखरा १४ मा क्रमशः कक्षा ११ र १२ मा अध्ययनरत बागलुङ , निसिखोला ७ का हिमाल विक र पोखरा १९ का रचना सुनारलाई जनही ७ हजार नगद र प्रशंसापत्रसहित संगम सिद्धान्त कुँवर स्मृति छात्रवृत्ति प्रदान गरिएको छ । आयुष्मा पन्थी र सुहानी गुरुङले सेयर सदस्य वा तिनका सन्ततिमध्येबाट कक्षा १२ मा उत्कृष्ट अंक ल्याई संगम योग केसी स्मृति पुरस्कार पाए ।

उनीहरुलाई जनही नगद ५ हजार र प्रशंसापत्र दिइयो । संस्थाकै कर्मचारी एवं सेवा केन्द्र प्रमुख लीलाकुमारी पौडेल कार्कीलाई नगद १० हजार र सम्मान पत्रसहित दीर्घ सेवा सम्मान प्रदान गरियो ।

६६ करोड ३७ लाख वासलात रहेको संस्थामा ४७ करोड ६३ लाख बचत संकलन र ४५ करोड ९० लाख लगानी छ । कार्यक्रममा सचिव धनराज पुरी, कोषाध्यक्ष भरतबहादुर थापा, लेखा संयोजक भोविन्द्र गिरीले पेश गरेको प्रतिवेदन सर्वसम्मत पारित भए । कार्यक्रममा मादी ४ का वडाध्यक्ष एवं सेयर सदस्य शिवप्रसाद सापकोटा, उपाध्यक्ष बुद्धिमान थापा, अक्षयकोषदाताहरु डा नम्रता केसी थापा र सन्ध्या कुँवर, कार्यालय प्रमुख बृहस्पति अधिकारी, सेवा केन्द्र प्रमुख लीलाकुमारी पौडेल कार्की लगायतले बोलेका थिए ।